Shillong, Iaiong 26: Mynta ka sngi Khasi Hills Autonomous District Council (KHADC) kala khot ia ka jingialang jong ka kommitee kaba ia dei bad ka kam pud kam sam, namar ha dien ba ka sorkar kala iasoi ia ka soskular hapdeng ki ar ngut ki myntri rangbah ka jylla u Conrad K Sangma bad u Himanta Biswa Sarma jong ka sorkar Assam.
U bah Jambor War Executive member shongknor ka Boundary Committee ba dei peit ia ka tnad Elaka la ong ba ha dien ka jingiasoi ia ka soskular kala mih ka jingbymhun khamtam eh na ki san tylli ki hima kiba la shah ktah bad ka jingbym kynthup ia ki hima bad ia ki District council kiba dei ki nongpeit ia ki hima.
Namar bym don lat shuh da kuwei namar u myntri rangbah ka jylla u la dep ban kren shai ba ym lah shuh ban pynkylla ia ka Soskular kaba la iasoi, na ka liang jong ki hima kiba don ia ki dulir kiba bat ia ki kot ki sla ka jinglong trai ia ka khyndew ka shyiap .
Ha kane ka jingialang la shim ia ka rai ban ujor sha iing bishar pyrshah ia ka jingiasoi ia ka soskular ban pynbeit pud ha pdeng ka Assam bad Meghalaya, ban leh ia kane la shaniah ha ka Coordination Committee ban leh ia kaba don kam, ban leit sha ei kan shong ha ka jingstad jong ka Coordination Committee ban khlieh da ka boundary committee.
Haba jubab ia ki jingkylli, u bah PN Syeim nongialam ka liang pyrshah hapoh KHADC la ong ba ha kane ka Coordination Committee kan kynthup ia ki san ngut ki nongai buid jong ki san tylli ki hima, u shongknor ka Boundary Committee, u nongialam ka liang pyrshah bad ban khlieh ia kane dei u EM ba dei peit ia ki kam Elaka u bah Jambor War.
Ka Coordination Committee kan ia shong bad ha die ba la shim ia ka rai kin sa rah sha ka Boundary Committee, hynrei ban pynkhreh kumno ban leh shaei ban iaid bad kaei ban leh nangne sha khmat shaniah ha ka Coordination Committee,ia ka jinglut jignsep ruh kan shong ha ka Coordination Committee kumno ban leh ha kaba ia dei bad ka jinglut jingsep.
Ia mynta kim pat lah ban ong ei ei namar kan shong ha ka jingbatai ka iingbsihar ynda kila ujor, ka daw ba kin ujor ka long ba kim hum ia kaei kaba la ia soi na ka liang ki Hima, ki Trai khyndew bad ka District Council bad ki khydnew ki shyiap ki dei jong ki Hima bad ki hima.
U pud u sam dei ban long katkum ka Assam Reorganisation (Meghalaya) Act 1969, ka North Eastern Areas (Reorganisation) Act 1971 bad ka Paragrpah 20 part II jong ka Sixth Schedule bad u pud u sam jong ki Hima dei katkum ka United Khasi-Jaintia Hills District.
U bah Bindo M Lanong la ong ba shisien bala leit ban mudui sha iing bishar baroh kin sa sangeh lut, ki kam kiba ia dei sorkar para sorkar bad shisien bala poi sha iing bishar hap ban sangeh lut.
