Shillong, Risaw 21: Ka seng Congress mynta ka sngi kala shim ia ka rai ban wengnoh ia ka jingkyrshan na ka Executive Committee kaba la ialam da u Bah PN Syiem hapoh jong ka KHADC, ha ka kynhun jong ka PDF. Ia kane ka rai ban wengnoh ia ka jingkyrshan la shim ia ka jingialang jong ki san ngut ki MDC ha ka jingialang ha iing jong u president jong ka MPCC u Bah DD Lapang.
U Bah Manstudy Nongrem nongialam jong ka Congress hapoh jong ka KHADC haba kren ha u SP News Agency mynta ka miet u la iathuh ba ia ka shithi ba kila wengnoh ia ka jingkyrshan ia ka EC jong u Bah PN Syiem la dep phah bad la ong ba la ioh pdiang da u CEM jong ka KHADC.
Wat la ka Congress kala wengnoh ia ka jingkyrshan na ka PDF hapoh jong ka KHADC, hynrei u Chairman bad u Deputy Chairman hapoh kane ka iing dorbar ki dei na ka seng Congress ia kaba la jied da ka iing dorbar. Kine ki MDC jong ka seng Congress hapoh jong ka KHADC ki long u Bah Proces T Sawkmie, u Bah J Tynsong, u Bah Lamphrang Blah, u Bah D Kharwanlang bad u Bah Manstudy Nongrem.
Da kane ka jingweng noh ka seng Congress ka EC mynta ka don sa 16 ngut ha ka iing dorbar kaba 23 ngut, ka EC jong u Bah PN Syiem ka dang skhem. Kane ka jingkylla syndet jong ka sain pyrthei hapoh jong ka KHADC ka dei na ka jingshah saspon noh jong u CEM na ka seng Congress.
na ka liang jong u CEM pat haba kren ha u SP News Agency u la ong ba haduh mynta ka miet um pat ioh pdiang da ka jingthoh ha kaba ia dei bad ka jingweng noh ki MDC Congress na ka EC jong ka PDF kaba u la ialam.
