Shil
long, Nailur 07: Ka Hima Mylliem ha dien 18 snem mynta ka sngi kala ioh ban pynlong ia ka Dorbar Hima, ia kaba la pynlong ha Madan Polo, ha kaba ki khun ki hajar na kylleng ka hima kila ia poi ia sakhilang ia kane ka sngi kaba khraw.
Ha dien ka jingia kren kaba bniah na ka liang jong u Acting Syiem jong ka Hima Mylliem u Pa’im Ainam Manik Syiem, u la pule ia kaei kaba la ia kren ha kane ka dorbar hima kaba la long mynta ka sngi la ka dorbar kan pdiang ne em ia ki rai.
Ha kane ka dorbar hima kaba la long mynta ka sngi la shim ia ka rai ba ia ka dorbar jong ka hima dei ban pyn long shisien ar snem, kum ka hima kan ia kren bad ka District Council, ba ia u pud u sam jong ka hima bad ka jylla Assam dei ban ia pynbeit noh da ka sorkar jylla. La rai ruh ba ka Hima ka dei ban don ia ka dorbar hima, Dorbar Raij bad dorbar shnong.
Halor kitei ki lai tylli ki phang ba la wan rah ban ia kren ha khmat jong ka dorbar hima kaba la long mynta ka sngi la pdiang ia ki bad la pynskhem ba ka hima ka dei ban bud ia kineki rai nangne sha khmat.
Ha kane ka sngi ki kiba khraw batri jong ki Hima kila ia poilang, ki Syiem raij ki rangbah shnong bad ki khun ki hajar na kylleng jong kane ka hima. Naki 15 ngutki MLA kiba hap hapoh jong ka Hima Mylliem kiba la poi ki long u Bah Mohendro Rapsang bad u Bah Adelbert Nongrum lem bad kiwei MDC.
Na ka liang jong ka KHADC kiba la ia poi ha kane ka jingialang ki long u CEM jong ka KHADC u Bah HS Shylla bad ka kynhun jong ka Executive Committee, kynthup ia u Chairman u bah Teinwell Dkhar bad kiwei ki para MDC.
Kiba kham paw kiba la ia poi ki long u Bah John F Kharshiing namar dei ma u uba la juh thoh sha ka KHADC ba ka dei ban bethah ia ka Hima Mylliem ba kan lum ia ka dorbar hima, u Syiem ba rim jong ka Hima u Pa’im Laborious Manik Syiem.
