Shillong, Jymmang 24: Ka jingialang jong ka Executive Committee jong u bah Teinwell Dkhar hapoh jong ka KHADC, ha ka jingiashong pyrkhat kam mynta ka sngi kala shim ia ka rai ban mang 1 klur ia ki MDC na ka pisa “special Assistant” kaba la wan na ka sorkar pdeng.
U Bah M N Mukhim Executive Member ba dei peit ia ki kam pynroi haba kren ha ki lad pathai khubor mynta ka sngi, u la ong ba ka pisa kaba ka sorkar pdeng ka ai ka long T.50 klur ym T.52 klur kumba la mih ha ki lad pathai khubor.
Na kane ka pisa ka KHADC kala dep ioh T.34 klur bad kaba sah ia kaba kin sa ioh noh shen ka long T.16 klur. Ha dien ba la thikna ba kane ka pisa kin sa ioh noh, na ka liang jong ka EC kaba la shong mynta ka sngi kala shim ia ka rai ba la mang mar 1 klur ia ki MDC ba kin phah skhim.
Kaba sah T.21 klur yn pyndon kam na ka bynta ban shna ia ki jingdon kam jong ka Council. Na ka liang jong u EM u la ong ba ka jingmang pisa ka long kum juh ia baroh ki District Council Constituency ba kan long mar kum juh.
