Shillong, Nailar 31: Ka jingialang kaba la long hapdeng ka Synjuk ki Rangbah Shnong (SRS) bad ka kynhun myntri mynta ka sngi kaba la neh kumba lai kynta duna ha Secretariat ban iakren halor ki lai tylli ki mat , ka Village Administration Bill jong ka KHADC, ka kam jong ka MUDA bad halor ki nongtrei sorkar ban bat kam shnong.
Na ka liang jong u myntri rangbah u Dr Mukul Sangma haba krenha ki nongthoh khubor ha dien ka jingialang, u la ong ba ha kane ka jingialang na ka liang jong ka sorkar bad ka synjuk jong ki Rangbah shnong kan kyrpad ia ka Khasi Hills Autonomous District Council (KHADC) ba kan khot biang noh ia ka Bill kaba la dep ban pass bad ban peit thymmai ia ka khnang ban pynioh kloi noh ia ka VAB ba kan long ain.
La ithuh ruh ba mynta ka sngi ka KHADC kala ai ia ki jubab halor ki kharar tylli ki phang kiba ka tand kam poih iing jong ka sorkar pdeng kala pan jingpynshai, halor kane ym lah ban tip sha katno por kan shim por, ia kane ka phang na ka liang jong u myntri rangbah u la ong ba u la kren ia u CEM jong ka KHADC u Bah PN Syiem.
Haba ia dei bad ka MUDA , la ia kren bun kiba ia dei bad ki jingeh kaba ki paidbah ki ia kynduh da kaba pyntrei kami a ka ain Greater Shillong Master plan, na ka kane la rai ban don noh da kawei ka shnat sorkar ka ban peit n aka bynta kito ki bym hap hapoh jong ki Municipal.
Haba ia dei bad kiwei ki kam kiba dei tang bad ki rule kumno ban ioh ia ki certificate ban ioh leit shong ha ki iing ba la dep ban shna, ban ioh ring light ban ioh ring um ka sorkar kan peit kumno ban pynkylla ia ki rule jong ka sorkar.
Halor ka kam bay m shah ban bat kam shnong ia ki nongtrei sorkar, ka sorkar mynta kan sa peit biang ia ki service rule kumno ban leh ha kaba ia dei bad kane kakam.
Na ka liang jong u Dr W Kharshiing Chairman jong ka SRS, u la ong ba kum ka synjuk, ki kwah ban iohi ia ka VAB ba kan long ain noh, kin ia sa kren ruh bad ki bor jong ka KHADC ha kaba ia dei bad kane ka kam, kumno ban leh ban ioh kloi noh ia ka VAB.
