Shillong, Kyllalyngkot 31: Mynta ka sngi da ki phew hajar ki paidbah na kylleng jong ka Bri-U Hynniewtrep ban ia poi sha ka jingiaid paidbah kaba la pynbeit da ka kynhun Confederation of Hynniewtrep Social Organisation ban pynpaw ia ka jingpyrshah kum ka jaidbynriew ia ka Citizenship Amendment Bill 2016 jong ka sorkar pdeng kaba la ialam da ka party BJP.
Ha kane ka jingialang na ka liang jong ka CoHSO kala khot ruh ia ki seng sain pyrthei jong ka jylla Meghalaya ba kin ia don bynta lang, kiba la poi sha kane ka jingialang paidbah ki dei ka party, UDP, Party PDF, party HSPDP, BJP bad ka KHNAM kiba don lang ha ka sorkar MDA kaba la ialam da ka seng NPP, ha ka jingkren jong kine ki nongialam na kine ki seng sain pyrthei, kila pynpaw ia ka jingpyrshah ka jong ki ia ka CAB.
Ha kane ka jingialang paidbah, ka party liang pyrshah ka seng Congress bad ka party NPP kaba ialam ia ka sorkar ha ka jylla Meghalaya kam shym la phah briew sha kane ka jingialang ban pyrshah ia ka Citizenship Amendment Bill 2016 jong ka sorkar pdeng ia kaba la khot da ka CoHSO wat la kane ka kynhun kala khot ia baroh ki seng sain pyrthei kiba don ha ka jylla.
Ki nongkren ha kane ka jingialang paidbah ha dien ka jingiaid paidbah kaba la pynlong ha Madan Student ki long na ki seng bha lang na kylleng jong ka Ri Khasi Jaintia, nalor ki seng sain pyrthei ha ka jingiadon lang ki MDC na ka KHADC.
Haba kut jong ka jingialang paidbah, u President Chairman jong ka CoHSO u bah Robertjune Kharjahrin u ha ka jingkren pynkut u la pynbna paidbah ia ki rai, ba kum ka jaidbynriew baroh kawei ka pyrshah ia ka CAB, 2016 jong ka sorkar pdeng kaba la wan rah da ka BJP bad ka rai kaba ar ka long ba ka sorkar jylla ka dei ban pyntrei kam noh ia ka Inner Line Permit ha kane ka jylla Meghalaya.
