Shillo
ng, Nailur 07: Ka jingialang jong ka Kabinet kaba la long mynta ka sngi kala shim ia ka rai ban pynjlan ia ka rta ban apply kam hikai sha ka 37 snem ka rta. Kane kan long na ka bynta baroh ki kam hikai ha ka sorkar jylla naduh kiba hikai klass Arit haduh kiba hikai ha ki Kolej.
Haba kren ha ki nongthoh khubor ha dien ba la kut ka jingialang jong ka kabinet, u myntri ba dei peit ia ka tnad pule puthi u bah Lahkmen Rymbui u la ong ba ka jingpynjlan ia ka rta apply kam ha ka kam hikai ka long ban hikai don kam ia kiwei kiwei ki jingpyntbit ruh nalor ka kyrdan pule jong ki samla.
La ong ba ha kine por kiba la leit noh ha dien ba kila pyndep ia ki jingpule kila long kiba bit ban hikai, hynrei mynta ban long nonghikai kila hap ban pynbit ia lade sa kiwei kiwei de ki jingpule ban kane kala bam ia ka por jong ki. Bun sien ki samla kiba don ia ka sap hikai kim treh shuh ki wad noh da kiwei ki kam namar ki tiengioh ka kutnoh ka rta wad kam.
Da kane ka jingpynjlan ia ka rta ka long ba kito kiba don ia ka sap ban hikai kin ioh ka lad ban pyntbit ia lade bad da kaba leh kumno yn ioh ia ki nonghikai kiba tbit bad kane kan kyntiew ia ka pule puthi ha ka jylla. Mynshuwa ka rta wat kam ka kut noh 32 snem kane ka long ia baroh. Kane ka jingpynjlan ia ka rta wad kam ka long tang ha ka kam hikai la ong u Bah Rymbui.
Ha kane ka jingialang ka kabinet mynta ka sngi la rai ruh ban thung 16 ngut ki nonghikai ha ka 3F, na ka bynta 13 ngut ki nonghikai ha ka Tura Goverment College bad 3 ngut ha Williamnagar Government College.
Kwei pat ka rai ka long ba ia ka bai bam jong ki khynnah ha ki LP skul bad ki UP skul kiba ialeh ia ka eksamin bai bam la pynkiew na ka T.100 tyngka shibnai sha ka T.600 tyngka ha ki LP skul bad iaki UP skul la pynkiew na ka T.40 tyngka shibnai sha ka T.600/- tyngka shibnai.
