Shillong, Risaw 20: U bah Paul Lyngdoh EM ba dei peit ia ka Town Committee hapoh jong ka KHADC u la iathuh ba ha ka jingialang jong ka Executive Committee kaba la long mynta ka sngi la shim ia ka rai ban pynduh noh ia ki san tylli Town Committee kiba don ha ki san tylli ki shnong.
U Bah Paul u la iathuh ba ki san tylli ki Town Committee kiba ka EC mynta ka sngi kala shim ia ka rai ban pynduh noh ki long ka Mawkyrwat Town Committee, Mawlai Town Committee, Sohiong Town Committee, Umsning Town Committee bad ia ka Mariang Town Committee.
Katba ia ka Nongpoh Town Committee la dang pynneh, hynrei la weng pat ia ki phra tylli ki shnong ba kin nym hap shuh ha ka Nongpoh Town Committee, katba ia ka Nongstoin Town Committee la pynneh ia ka tang ba kan long tang na ka bynta ki 10 tylli ki shnong.
U bah Paul u la ong ba ka ophis kala ioh ia ki jingthoh na kitei ki Town Committee namar ha kane ka jingthoh khanasamari ka ban sdang mynta u snem bad kan kut ha u snem 2021 kala don ki kyndon kino ki shnong ki ban hap hapoh ka Town Committee, lada ka KHADC kan weng noh ia kitei ki Town Committee ha kane ka khanasamari kan paw ba kila dei ki jaka sor.
Ban pynlait ia kitei ki san tylli ki Town Committee na ka jingithuh kum ki jaka sorkar ka KHADC kala shim ia ka rai ban pynduh noh ia ka jinglong Town Committee jong ki san tylli bad kiba sah kan long sa tang ka Nongstoin kaban don sa tang 10 tylli ki shnong hapoh ka Town Committee bad ka Nongpoh kaba la weng noh phra tylli ki shnong.
