Shillong, Nailar 22: Ka seng ki nongtrei hapoh jong ka Garo Hills Autonomous District Council (GHADC) ia kaba la tip kum ka Non-Gazetted Employees Association ha ka jingialang kaba la long mynta ka sngi kila shim ia ka rai ba kin dawa ban tohkit da ka CBI halor ka jingbym don pisa ka GHADC.
Ha kane ka jingiakynduh lang ka jong ki kaba la long mynta ka sngi kila shim ia ka rai ba ha ka 28 tarik mynta u bnai kin pynlong ia ka jingiakhih shong kyllian mungor, ha katei ka juh ka sngi kin pynlong ruh ia ka jingiakhih da kaba iaid paidbah da kaba jar jar.
Na ka liang jong ka seng kan ai biang da ka mukotduma pyrhsha ia ka GHADC hapoh jong ka Meghalaya High Court ha kaba ia dei bad ka jingbym ioh ia ka jong ki ia ka tulop kaba la iaid mynta la palat 11 bnai. Kine ki long ki rai kaba ki la shim mynta ka sngi lada ki bor jong ka GHADC kim peit ia ki jingdawa jong ka seng.
Ia kane ka jingialang kaba la long mynta ka sngi la pyniaid da u president jong ka seng u Toesik Itseng S Sangma. Katba ha ka 21 tarik mynta u bnai ki nongtrei jong ka GHADC kila pynlong ia ka jingiakhih da kaba ieng ha khmat jong ka ophis ha GHADC ha ka sngi nyngkong.
