Shillong, Nailar 31: U Symbut Myntri Rangbah ka jylla u bah Preston Tynsong la iathuh ba mynta ka sngi kala don ka jingiakynduh ka tnad pynroi sor bad ka sorkar ha kaba u myntri kam pynroi sor u bah Sniawbhalang Dhar ruh u la don lang, ki ophisar jong ka Shillong Municipal Board bad na ka ophis Deputy Commissioner ba dei peit ia ki jaka puta.
U bah Prestone u la iathuh ba ha dein ba la shim na baroh ki liang mynta ka sngi kila pdiang ia ki jaka kiba la ithuh da ka tnad pynroi sor ban pynkynriah ia kiba sah ha Iew Mawlong, kila shim ia ka rai ba yn pynkynriah sha ka jaka ba don mynta ki jaka sah kiba don pyrshah ka jaka sah u nongialam ka liang Pyrshah, kaba long mynshuwa ka ophis jong ka SMB.
Ka tnad pynroi sor kala ai ia ka jingpynshai kaba bniah ha kaba yn pynkynriah ia ki sha katei ka jaka, ka tnad pynroi sor kala peit bniah ia baroh ki iing kiba don ha katei ka jaka bad kat kum ka kaiphot kala ai ba ha katei ka jaka lah ban pynkynriah ia baroh ki long iing kiba don 342 ki long iing lah ban pynkynriah ha katei ka jaka.
Kitei ki long ki jingiakren ha kane ka jingialang kaba la long mynta ka sngi, ha ka juh ka por la bthah ia ka tnad pynroi sor ban dang ai shuh shuh ia ka jingkhein kaba bniah katno kan lut ban shna ia ki iing ki sem ha katei ka jaka bad ha dien ba la ioh ia ka kaiphot yn sa khot ia ka jingialang jong ka High Power Committee leh se kan long ha jan kut u Nailur bnai ban wan.
Ka rai ka long ba ka sorkar kan shna 12 tylli ki iing bad ha kine kin don ki kamra iing ban ngain ia ki 342 tylli ki long iing, ia ki iing kiba don mynta ha katei ka jaka namar kim long kiba biang la rai ban shna biang ia ki katno kan lut ym pat tip la ong u bah Prestone.
Katei ka jaka ka don kumba 2.5 akar bad kane ka dei ka rai kaba kila rai mynta ka sngi ba kin rah ia ki briew kiba sah ha Iew Mawlong sha katei ka jaka ba don ki iing jong ki Municipal kiba la dep ban shna mynshuwa. Kitei ki iign 342 tylli dei kiba la don jingkhein ruh ha poh High Court ka jylla Meghalaya.
