New Delhi, Jymmang 02: Ka Cabinet Committee na ka bynta ki Economic Affairs, ba la ialam da u Myntri Rangbah ka Ri, Narendra Modi ka la mynjur ia ka jingpynheh bad jingpynbha ia ki integrated terminal ha kad liengsuin ba don ha Chennai, Guwahati bad Lucknow ban shong dor T.2467 klur, T.1383 klur bad T.1232 klur.
Katkum ka rai jong ka Union kabinet mynta ka sngi ka long ba ia ka Kad Liengsuin ha Lucknow, Yn shna ia ka Integrated Terminal ba thymmai ka ban heh haduh 88,000 sqm ban iasoh lang bad ka terminal ba lah don lypa (16292 sqm). Lyngba kane, kane ka kad liengsuin kan lah ban trei na ka bynta 2.6 million ki briew kiba shong liengsuin shabar ri bad 11 million kito kiba shong liengsuin sha ki jaka ba don hapoh ri. Kane ka building ba thymmai kan lah ban pyndap ia ki jingduna ba la mih hadien ka jingkiew ki briew kiba shong liengsuin haduh u snem 2030-31.
Kad liengsuin ha Chennai, Kane ka terminal building, ban kynthup lang ia ka building ba la don lypa kan don 336000 sqm ka ban lah ban trei na ka bynta 35 million ngut ki briew ha ka shi snem. Kane ka building thymmai kan pyndonkam ia ka jingstad ‘green building’ da ka jingthmu ban ioh ia ka jingithuh GRIHA-4 Star. Kane ka building kan lah ban trei na ka bynta ki jingdonkam jong ki briew ba shong liengsuin haduh snem 2026-27.
Kad lienguin ha Guwahati, Ka building ba thymmai kan don 102500 sqm ban ailad ia kane ka kad liengsuin ban trei na ka bynta 9 million ngut ki briew ha ka shi snem. Da kine ki jingshna thymmai, kane ka kad liengsuin kan lah ban ai jingmyntoi ba pura haduh u snem 2026-27. Kane kan plie lad ruh ia ki briew nabar ka thain shatei lam mihngi ba kin wan sha kane ka thain bad ba kin seng kam seng jam hangne katkum ki jingthmu jong ka ‘Act East’ Policy.
Haba iohi ia ka jingdonkam jong ka infrastructure ha ka ioh ka par, ka Sorkar Pdeng ka la ban bha ha kane ka phang ha ka Union Budget 2018-19. Kumta, ka Sorkar Pdeng ka la wanrah ia ka National Civil Aviation Policy (NCAP), kaba plie lad ia ka jingkiew ha ka liang ki kam ba iadei bad ki liengsuin ha ka ri baroh kawei. Kane ka mat treikam ka thmu ruh ban wanrah ia ka jingkiew ka roi ka par ha kane ka ri jong ngi da kaba plie lad ia ki briew ba kin leit jingleit da kaba pyndonkam ia ki liengsuin ha ka dor kaba bit lyngba ka Regional Connectivity Scheme (RCS), kaba la tip kum ka UDAN (Ude Desh ka Aam Nagrik).
La don ka jingkiew kaba khraw kaba long kumba 18 haduh 20 percent ha kine ki 3 snem ba lah dep. Katkum ka jingwad jingtip jong ka IATA Traffic Study, ka ri jong ngi kaba don ha ka kyrdan kaba 7 mynta kan sa kiew sha ka kyrdan ba 3 ha u snem 2023-24 da kaba beh ia ka UK, Japan, Spain bad Germany. Ka jingkiew ha ki briew India kiba shong liengsuin sha ki jaka hapoh ri mynta ka long kaba heh tam ha kane ka pyrthei.
Haba iohi ia ka jingdonkam, ka Sorkar pdeng ka la plie ia ka NABH Nirman (NextGen Airports for Bharat), ha kaba yn lah ban don haduh 1 billion ki jingher liengsuin ha kine ki 10 ne 15 snem ban wan.
Ka jingkyntiew ia ki kad liengsuin ka donkam ia ki kad liengsuin greenfield bad ka jingkyntiew ia ki kad liengsuin brownfield kiba la don lypa bad ia kane yn bei tyngka da ki riew shimet ryngkat bad ka Airports Authority of India.
Ka Airports Authority of India ka dang pyntreikam ia ki jingthmu ban pynheh bad kyntiew ia kine ki kad liengsuin khnang ba yn lah ban iakynduh ia ki jingdonkam bapher bapher da kaba kyntiew ia ki kad liengsuin ha Chennai, Guwahati, Lucknow, Agartala, Patna, Srinagar, Pune, Trichy, Vijayawada, Port Blair, Jaipur, Mangalore, Dehradun, Jabalpur, Kolhapur, Goa, Rupsi, Leh, Calicut, Imphal, Varanasi & Bhubaneswar ha ka dor T.20178 klur ha kine ki 4 ne 5 snem ban wan.
Ka AAI ka la sdang pyntreikam ha Agartala, Calicut, Port Blair ha kaba yn shna ia ki integrated terminal ha katkum kip or mynta bad kan sa ai jing mynjur ia ki kam ba kin sdang ha Chennai, Lucknow bad Guwahati ha ka dor T.2467 klur, T.1383 klur bad T.1232 klur. Kumjuh kan pynjrong ia ki runway, kan shna ia ki apron bay kiba thymmai ban plie lad ia kito kiba pynher ia ki liengsuin kiba la ai order mynta ban thied kumba 900 tylli ki liengsuin ha kine ki 10 snem ban wan.
Hapoh ka New Greenfield Airport Policy, la thmu ban don bun tylli ki kad liengsuin ha ki nongbah ba heh. Ka Sorkar ka la ai jingmynjur ia ka Noida International Airport (Jewar), Mopa (Goa), Purandar Airport (Pune), Bhogapuram Airport (Visakhapatnam), Dholera Airport (Ahmedabad), Hirasar Airport (Rajkot).
La mang T.50000 klur na ka bynta ka jingkyntiew ia ki kad liengsuin Greenfield kiba thymmai bad ka Sorkar ka la ai ia ka jing mynjur ia kane. Ha ka private sector, la sdang ban trei na ka bynta ka jingpynbha bad jingkyntiew ha ki kad liengsuin ba don ha Delhi, Bengaluru bad Hyderabad ha ka dor T.25000 klur ha kine ki 5 snem ban wan.
