New Delhi, Naitung 10: Ka Union Kabinet jong ka sorkar pdeng mynta ka sngi kala shim ia ka rai ban wanrah ia ka jingpynkylla ia ka ain “Protection of Children from Sexual Offences (POCSO) Act, 2012” khnang ban pynshitom ia kito kiba leh beijot, khamtam eh ia ki khynnah kiba hapoh ka 18 snem.
Da kaba wanrah ia kane ka jingpynkylla ia katei ka POCSO, Act, 2012 ka long ban dang kham pykhlain shuh shuh ia kane ka ain khnang ban dup lah ban pynshitom kham tyngeh ia ki nongleh kam sniew kyntup ruh ban rai set phatok shi jingim ia u nongleh kam sniew.
Kane ka ain kan long ban khang ruh ia ka jingthad ia ki dur jong ki khynnah da kaba dain kuna bad set patok. Kane ka jingwanrah ia kane ka jingpynkylla ha kane ka ain kan iarap ban khanglad ia ka jingshah leh beijot ia ki khynnah bad kane ka long ban iada ia ki kynthei khynnah.
Kane ka jingwanrah ia ka jingpynkylla ka long ban batai shai ia ki jingpynshitom ia kito ki nongleh beijot. Ia kane ka ain la wanrah ha u snem 2012 ban iada ia ki khynnah na ka jingshah leh beijot bad ban bein jong ki. Katkum kane ka ain kiba hapoh ka 18 snem la neiw ba ki dei ki khynnah.
