Rai ki Khlieh Nongsynshar ban leit sha ka jingialang bala khot da ka KHADC

Shillong, Nailur 11: Ka Dorbar Ki Khlieh Nongsynshar ka Ri Hynniewtrep, bad ka Federation of Khasi States, kaba la ia kynduh mynta ka sngi  por 11 baje ka 11 tarik Sept 2017, ki la ia tai halor ka dorkhast bad ka shithi Sorkar Jylla kaba la sah kut mynta naduh 3 tarik August 2012 namar ka jingbym jubap na ki bor KHADC halor ka nongrim jingdawa ki Khlieh Nongsynshar jong ki halor ka IOA & AA, sha ka Sorkar Jylla kaba la pan ia ka jingshai halor katei ka phang namar ka shithi kaba la wan na ki bor Sorkar India.  Hadien ka jingiatai kaba sani bha ki khlieh nongsynshar ki la iohsngew ia ka jingpynshai na u Bah John F Kharshiing, halor ka jingiakren bad ka kynhun MITCRM – (kaba kynthup ia ka Synjuk Rangbah Shnong(SNSKBH), KSU, FKJGP, HNYF, AJYWO, JYF, SAMOLA, FKS, GCCM, bad kiwei kiwei ) bad ki Khlieh Nongsynshar ki la kyntu jur ba ka nongrim jong ki ka long ba ka Sorkar India ka dei ban pynpaw shai ia ka jinglong Dorbar Kur, Shnong, Raid bad Hima ha kaba shai kdar hapoh ka Constitution Ri India. La pynkynmaw ba ki Hima khasi ki la phah ruh ia ka draft Schedule khadlai sha ka Sorkar India ha u snem 2003 lyngba ka Steering Committee ka Synjuk ki Hima Khasi.

Ha kaba iadei bad ka jingkhot na ki bor KHADC,  Ki Khlieh Nongsynshar ki la rai ban leit sha ka jingialang ba la khot da ki bor KHADC namar haduh mynta ki dang long hi ki shakri jong ka KHADC lyngba ka jingshim SANAD kaba la neh naduh por phareng,  bad ba kin sngap thuh aiu ki bor KHADC ki mut ban ong haba ka dorkhast ki Hima Khasi ka la dep iaid bun sien sha ki  Prime Minister barim bad sha u Prime Minister uba mynta, uba haduh kine ki sngi wat hadien lai snem ka jingbat ia ka jingsynshar um shym la jubap haduh kine ki sngi namar imat ki iai ap ia ka jubap na ki bor KHADC halor ka jingtyrwa ban ioh ia ka ScheduleKhadlai (Thirteenth Schedule) lane ka Article 370A kaba la ai ha ka Sorkar India.

U Paiem Phrester M Syiemlieh, Syiem Hima Nongkhlaw, Vice President, Federation of Khasi States,  ha ka jingkren u la pynpaw ia ka jingsngew bitar bad ka jingsngew duh mynsien ha kaba u la ong lada ki bor KHADC ki kwah ban pynbha ban pynjanai nyngkong ki la dei ban weng lane pynbeit ia ka The U K & J HADC Appoinment of Chief and Headmen Act 1959 namar ka long kaba pynhiar dor haduh katta ia ki Rangbah Shnong, Sordar Shnong, Myntri, Basan, Syiem, Lyngdoh, Sirdar, Wahadar, Dolloi, kat haduh ba ka Supreme Court ka la kynthoh ha kawei na ki case 1959, ba ka SANAD bad katei ka Ain 1959 ka la pyniaryngkat dor ia ka kyrdan ki Khlieh Nongsynshar naduh ki Myntri Kur, ki Shnong, Raid haduh Hima ba ki long kum ki nongaisha ha ki dukan ia kaba ki bor KHADC lyngba ka jingbatai ha katei ka AIN  ki lah ban shah weng ha kano kano ka por katba ha ki por phareng ka kyrdan jong ki ka long kaba khampher.

Shuh shuh u Syiem Hima Nongkhlaw, da ka jingsngew khia u la ong ba lada kan bteng kumne kum ki Shakri KHADC kan bha shwa ban shah pynwai ha kiwei kan bha ban pynwai noh hi ia ka jonglong Hima ai kan wan katba ka wan lehse ha kata ka por kan wan noh da ka Panchayat namar kum ki shakri KHADC kim don nongrim ban pynbteng ia ka jing long Hima kaba shah teh ha ki kyndon shakri bad u la ong ba man ki Hima ki la dei ban ia thir bha ia kane ka kam.  Wat lada la thaw ia ki Act ki Rule Hima katei ka Ain 1959 ka dang neh kum ka Principal Act ka thymmei jong ka jing teh. U Paiem Hima Nongkhlaw u la ong ba kan bha ban ia shai noh namar ban shu ia im ha lyer kam myntoi shuh khamtam hadien ka jingbatai kaba la wan da kaba shai ha ka jubap ka shithi Ministry of Home Affairs Sorkar India halor ka VAB. Katkum katei ka shithi January 2016 na ka tnad MHA Sorkar India, ka paw shai kdar ba ka ong ba ki Ain KHADC ki dei ban kdup lang ia ki wei ki riewlum bad dei ban kynthup lang ia u dkhar u lynkien na ri thor kiba dei ki “original inhabitants”.

Kane ka shithi MHA ka long ka sakhi ba ka Sixth Schedule kam dei shuh tang na ka bynta ki Khasi namar hap ban pynjngut ialade bad ban ia shong Dorbar lang bad kiwei ki jaidbynriew ha ka jingim Sixth Schedule.

Ka la don ruh ka jingiakren halor ka jingbym shim khia ki bor KHADC haduh kine ki sngi halor ki Hima ki ba khlem lum shuh ia ka Dorbar Hima, bad u Paiem u la kyntu ia ki Hima ki bym lum Dorbar Hima ba kin shim khia ban lum tikna ban shai ka jingkhien jingdiah jong ki Dorbar Kur, Dorbar Shnong, Dorbar Raid bad khamtam ki Dorbar Hima la kumno kumno shisien shisnem. Haba ki Hima kim lum Dorbar Hima kaei ka lynti ia ki khun ki hajar ka dei ban shai – kumba ka don ka kyndon ia ka Parliament, bad Assembly ba ki dei ban lum Dorbar shisien saw bnai, bad haba thylli ka shuki MP ne MLA hap ban pyndap hapoh hynriew bnai hynrei ki Ain KHADC lah ban neh Acting Syiem da ki phew snem kaba long kaba bakla jur.

Ka la don ruh ka jingiakren halor ka jingdonkam ia ka iing dorbar thaw ain – ki Khlieh Nongsynshar – ha kane ka liang u Bah John F Kharshiing, Chairman, Ka Dorbar  Ki Khlieh Nongsynshar Ka Ri Hynniewtrep, bad Spokesperson, Federation of Khasi States, u la ai ia ka report halor ka jingia treilang bad ka kynhun MITCRM bad ka jingiakynduh dang shen bad u Bah PN Syiem, CEM ha KHADC ha kaba u la ong ki jingiashut reng bad ki CEM KHADC kam long shuh kaba thymmai ia ka Federation of Khasi States, u la pynkynmaw ia ka jingbyrthen ki ba bun ki CEM barim ha kaba um shym sangeh ia ka thong ban pynpaw ia ka Hok ki Hima Khasi States. Ki la bun ngut ki CEM ki la wan bad ki leit hynrei ki Dorbar Hima ka Federation of Khasi States, ka dang iai neh haduh kine ki sngi.

Haba ia kren halor ka jingdon kam ban pynduh ia ka jingdon party hapoh KHADC u Bah John Kharshiing, Chairman, Ka Dorbar  Ki Khlieh Nongsynshar Ka Ri Hynniewtrep, bad Spokesperson, Federation of Khasi States, u la pynpaw shai ba ka por ka dawa ban ia kren halor kane ka phang lane la dei ban mynjur ban ai noh la ka jong ka Assembly khlem party tang na ka bynta ki khlieh Nongsynshar katkum ka IOA & AA.

U la ong i. Ki MP ki don ka bor ha  Parliament ban thaw Ain Ri India, ki Amend (pynbeit) lane Pyndam ia ki Ain kiba bakla,  ii. Ki MLA ki don ka Dorbar thaw Ain jylla Assembly  iii.  ki MDC ki don ka District Council ban thaw Ain ban pyndam ban pynbeit ia ki Ain ADC  iv. Ia kitei lai MP, MLA, MDC la jied shii sien san snem. Ym lah ban weng shwa ka san snem.   Katba Ki President / Rangbah Kur-Dobar Kur, Rangbah Shnong, Sordar Shnong, Bakhraw (Myntri), Syiem Raid, Lyngdoh, Sordar Raid, Dorbar Raid, ki Syiem, Lyngdoh, Sirdar, Dorbar Hima Kim don Parliament, Assembly lane District Council - ki don tang ka Dorbar Kur(shi jait) , Dorbar Shnong(baroh ki nongshong Shnong), Dorbar Raid(baroh ki nongshong ka raid) bad Dorbar Hima(baroh ki Khun ki hajar) kaba ym pat paw, ithuh, long Ain, bad ym pat lap haduh kine ki sngi hapoh ka Constitution Ri India.

Katba ha ka thymmei ka jingsynshar ki Nongsynshar tynrai  YM DON SAN SNEM,  ma ngi ki Khun ki Hajar ngi lah ban weng ia ki ha Kano Kano ka por lada haba ba ki la duh ia ka  jingshaniah u khun u hajar .  YM JUH DON RULING NE OPPOSITION namar ha ka jingsynshar tynrai u Khasi la shim ia ka rai “uba bun ba lang” kaba mut “CONSENSUS” ngim juh shim ia ka rai da ka “MAJORITY” Kane kien ka dei kaba ngi iai pyrta haduh kine ki sngi. Ka Dorbar ka la rai ban ia kynduh biang hadien ka 13 tarik September 2017.

What Next?

Recent Articles

Leave a Reply

Submit Comment
*