Shillong, Nailar 16: Ha ka sien kaba nyngkong eh Ka Khrawsing Christian College, Mawngap ka la rakhe ia ka Sngi Jinglaitluid jong ka Ri India ba 71 ha ka 15th August 2017 ha ka college ha Mawngap.
Ha kane ka sngi la sdang ia ka jingrakhe kaba I shongkun da ka jingpynher ia ka lama India da u Rev. W. F. Iawphniaw, Executive Secretary jong ka Mawphlang Presbytery ba la bud da ka jingrwai ieit ri jong ka Ri.
Ki khynnah ki la ioh ban ai ia ki jingrwai bad ki drama ba iadei bad ka jingrakhe. La ioh ruh ia ka ka jingpyniriam tynrai haka ba ki khynnah jong ka college ki la riam ha ki dustur riam bapher bapher jong ka Ri India.
U Dr. Rusievan Shangpliang u la ai ia ka jingkren ba kyrpang ha ka ba iadei bad ka jingialeh laitluid jong ka ri na ka jing synshar ki nongwei. Ka mat ba kongsan ba u la kdew ka long ka jingjia ha Jallianwala Bagh, Amritsar (1919) kaba pynkynmaw ia ngi ba ka jingiatylli hapdeng ki nongIndia khlem da iapeit ia ka jingpher niam ne jaidbynriew ka pynkhynniuh ia ki Nongsynshar British.
Bad hapdeng ka jing ialeh ym tang ki riewkhmat ne riewpawnam ki la len iala ka jingim na ka bynta ka ri hynrei ki paidbah ruh ki la aiti ialade na ka bynta ka Ri bad ngi dei ban kynmaw ban pyndonburom ia ki kumjuh. La ioh ruh ki jingaikhublei na ka Principal ka kong Dr. B. Kharkongor bad ki jingkyrkhu kyrdoh na u Rev. P. Thabah, Memebr Governing Body.
