Shillong, Nohprah 22: Ka Tylli lang Seng Samla Shnong Manad kum shibynta ban rakhe ia ka jingda
p 25 snem jong ka Synjuk ki Seng Samla Shnong Central body, ka la pynlong ia ka Tamasa lehkmen lyngba ki Programme bapher bakher ha ka dang shen ha kaba 5 tylli ki Shnong ba marjan ki la wan ban iashimbynta lang.
Ha ka bynta ba nyngkong jong kane ka tamasa, halor ka theme “To ngin long adkar la ka Tynrai,Mariang ngin Tyngkai” ka la don ka Jingiakop pyni Khasaw, ka jingialeh Volley Ball hapdeng 5 tyli ki Seng Samla Shnong ha kaba ka Seng Samla Lummawbah ka la rah ia ka nam jop pyrshah ia ka Seng Samla Mawbidong.
Ka la don ruh ka jingpynkup burom ia ki Samla Pule kiba wan shakhmat kita ki long U Samla Pynshailin Shangdiar ha ka B.Sc (Honours) bad ka Lily Nongsiej ha SSLC Examination 2017. La ioh ban pynkup burom ruh ia ki Tymmen Shnong kiba la rim tam (Senior most citizen), da U Samla Kitborsing Lyngdoh, Genl. Secretary, SSSS, SWKHD Unit bad ia u Samla Rudy Shylla, u Nongseng ia ka Seng Samla Shnong Manad da U Samla Skhembor Nongrum, Organising Secy, SSSS, SWKHD Unit. La ioh ruh ia ka jingnoh synniang ia ki longing kiba la shah pynjot ha ki bor mariang mynta u snem.
Ha kane ka sngi la pynphuh pynphieng da ka jingialehkai drama halor ka jing tyngkai ia ka Mariang bad shaphang kumno ban rep ban riang ryngkat ka jingrwai phawer bad Sur Tynrai da ka Seng Samla Manad.
Ha ka bynta kaba ar jong kane ka tamasa ka la don ka jingialang ha kaba ha kaba la pyniaid da u President ka TSSS Manad, Bah I.K.Hari. La ioh ia ka jingkren na u Samla Wallambok Syiemiong, Chairman ka SSSS, SWKHD unit uba la kyntu ia ka Seng Samla Shnong Manad ban iatreilang ryngkat ryngkat bad ki Seng Longkmie bad ka Dorbar Shnong kum lai tylli ki mawbyrsiew ban kyntiew ia ka bha ka miat bad ban rat dyngkhong ia ka jingsahdien.
U la kyntu ruh ban bud nuksa ia u Dr.B.C Lyngdoh uba wan na ka longing kaba jynjar, hynrei u la kylla long uwei na ki Scientist uba la leit trei kylleng ki ri jong ka pyrthei, kum u khlur ba la lam lynti ia ka thain hi baroh kawei. Laioh ruh ka jingkren na u Samla Bokstar Syiem, Health Secretary ka SSSS, Central Body uba la kyntu ba ki 3 tylli ki dak ABK kiba thew ia ka Akor, ka Burom bad Kamai ia ka Hok kaba mut ki Seng Samla Shnong, ki Seng Longkmie bad ka Dorbar Shnong kin iatreilang halor kine ki nongrim, bad ban pynneh ia ka jingitynnad jong ka Meimariang.
La ioh ia ka jingkren na u kongsan u Dr.B.C.Lyngdoh, uba la ai mynsiem ia ki Samla ba kin trei shitom ha ki liang baroh khamtam ha ki jingpule khlem da klet ia la ka jong ka tynrai. U la ai nuksa ruh ia ka Seng Samla rit jong ka Mizoram ka Mizo Young Association kaba la ioh ia ka jingkyrshan na ki ba bun balang namar ka jingshakri hok da ka jingkhuid jingsuba ia ka Imlang Sahlang jong ki Mizo. La ioh ruh ia ka jingkyntu kynpham bad kyrkhu Kyrdoh na u Myntri ka Shnong Manad, Bah K.Shylla. La pynkut ia ka jingialang da ka jingkren aikhublei na U Samla Pauldip Tongwah, Sport Secretary TSSS Manad.
Ha kawei pat ka khubor ka Seng Samla Shnong Manad ka pynpaw ia ka jingsngewdiaw, namar ha kane ka sngi, ki Media kim shym la lah ban poi watla ka la don ka jingpynbeit ban leit jurip ia ka jingsuki palat jong ka jingpyntrei ia ka surok PMGSY na ka Shnong Tynnai sha ka Shnong Manad bad ki Shnong ba marjan, kiba kynthup ia kumba 500 tylli ki longiing. Kane ka Surok ka la sahkut sah hajuh naduh u snem 2012 ka bym pat poi shano shano ruh katba bun ki nongshongshnong kiba la khlad noh na ki jingpang jingshitom na ka daw jong ka jingbymdon ka surok. Ka la long ruh ka jingduh kaba khraw ia ki mar rep kum u kwai, tympew, synsar, sohphan bad kiwei kiwei kaba la ktah bha ia ka kamai ka jih na ka daw ka surok bad khamtam eh ha ka jingshah khniot bein ki Nongrep ha ka dor ka mur.
Kumta ka TSSS Manad ryngkat lang ka SSSS, SWKHD Unit, ka SSSS, Seng Kmie da ka mynsiem ka jingsngewsynei bad kitkhlieh ki la kyntu mardor ia ia ka Sorkar bad ia u/ka Contractor ba kin pynkloi shait shait ia ka jingpyntrei ia kane ka surok lym kumta kin hap ban pyrkhat da kiwei pat ki lynti. Pynkut ka kyrwoh ba la phah da u Bah. Khrawsing K.Kharai, Genl. Secretary Tyllilang Seng Samla Shnong Manad.
