Shillong, Kyllalyngkot 12: Ki pulit jong ka jylla Meghalaya kila registered da ka “Suo-Moto case” ha ka 07th Kyllalyngkot 2019 pyrshah ia ka North East Students Organization NESO, bala kyrshan da ka KSU ban khot ia ka pakhang shnong ha ka 08/01/2019 naduh ka por 5 baje mynstep haduh ka por 4 baje jan miet ha ka dong shatei lam mih ngi jong ka Ri India baroh kawei da kaba san ia ki kot lyngkdop ha nongbah Shillong ban pyrshah ia ka jingpdiang ia ka Citizenship Amendment Bill 2016 ha Parliament.
Kane ka jingkhot ia ka pakhang shnong kala pynkhein ia ka hukum jong ka iing bishar jong ka High Court jong ka Meghalaya, kaba la khang pyrshah ia ka jingkhot ia kano kano ka rukom khot pakhang, ne khang surok da kaba pynmih ia ki jingthoh lyngba kano kano ka rukom kaba lah ban ktah ia ka shnong suk shongsain ha ka jylla.
Ki pulit jong ka jylla kila register ruh ia ka “Suo-Moto case” ha ka 09/01/2019 pyrshah ia ka Confederation of Hynniewtrep Social Organisation (CoHSO) kaba la khot ia ka pakhang surok miet ha ka 10/01/2019 naduh ka por 7 baje mynmiet haduh ka por 5 baje mynstep jong ka 11/01/2019 ha ka jylla Meghalaya, kane ruh ka long pyrshah ia ka hukum jong ka iing bishar jong ka High Court jong ka Meghalaya kaba la khang pyrshah ia ka jingkhot pakhang la ka long ha kano kano ka rukom kaba lah ban ktah ia ka shong suk shong sain.
Ki pulit ka jylla Meghalaya ha ka 11th Kyllalyngkot 2019 kila register ia ka “Suo-Moto case” pyrshah ia ki lai tylli ki seng ka HNYF,RBYF bad FKJGP, namar ha katei ka sngi por shiteng sngi khlem da ioh ia ka jingbit na ki bor jong ka District administration jong ka East Khasi Hills District hynrei ki nongialam jong kine ki lai seng bad ki dkhot jong ki, kila ia lum paidbah ha Khyndailad, ha jan jong ka iing dorbar thawain barim jong ka jylla ban pyrshah ia ka jingpdiang hapoh parliament ia ka Citizenship (Amendment) Bill 2016.
Kumta ka jingialum paidbah ban pynlong ia kano kano ka jingpyrshah kala wanrah ia ka jingshong syier ha ki paidbah nongleit nongwan bad kala pynwit ia ka leit ka wan jong ki kali bad ka jingthut ia ki paidbah ba iaid ba ieng, na ka liang jong ki pulit ha kaba register ia ka “Suo-Moto Case” pyrshah ia ki nongialam jong kitei ki seng bhalang la ong ba ki nongialam kila kren ha kane ka jingialang ia ki ktien kiba lah ban wanrah ia ka jingiapher jaidbynriew.
