Shillong, Naiwieng 01:Ka Wahsynon ‘A’ bad ka Umkremdykhong ‘B’ ki la rung sha ka phainal ha ka lympung ialehkai bol ba la pyniaid da ka seng CoRP Jirang Cirle ha madan ialehkai ha Umsohpanan, New Jirang.
Ha ka jingiakhun semifinal mynta ka sngi Ba-ar ka long hapdeng ka Wahsynon bad ka Friend United na Old Jirang, ka Wahsynon ka la pynliem noh da 5-1 ia ka Friend United.
Ha ka jingiakhun ka Wahsynon ka la ialehkai bha ha kaba ka la ioh ban thep san kol katba ka Friend United ka la ioh ban pynphai kylla tang shikol.
Ka Wahsynon kaba la khur ia ka jingjop ka la rung sha ka phainal bad kan iakhun pyrshah ia ka Umkremdykhong ban iaknieh ia ka nam lahduh, katba ka Friend United ba rem kan ioh rah ia ka nam balai ha kane ka tournament.
Ha ka jingiakhun semifinal banyngkong ha ka sngi Saitjain, ka Umkremdykhong ka la pynliem ia ka Umlakro lyngba ka tie breaker da 4-3.
Ka jingialehkai hapdeng kine ki kynhun ka long mar iabiang bor, ia kane la sakhi ba ym don mano mano ba ioh ban thep ia ka kol nam jop haduh bakut ka jingialehkai bad ka jingiakhun ka la kut da 3-3.
Kumta ki bor pyniaid ki la pyniakhun da ka tie breaker bad ka Umkremdykhong ka la jop da 4-3 kol.
