Mairang, Kyllalyngkot 25: Ryngkat bad ka Ri baroh kawei mynta ka sngi ka Mairang Civil Sub Division kala pynlong ia ka jingrakhe ia ka “10th National Voters’ Day 2020” ha Mairang ha ophis jong u Divisional Officer ba dei peit ia ka tnad ilekshon.
U Bah A Nongbri SDO jong ka Mairang Civil Sub Divison ba dei peit ia ka kam ilekshon haba kren ha kane ka sngi kum u kongsan u la pynsngewthuh ia ki paidbah ba ka long kaba don kam ban thep vote kaba dei ka hok jong ki.
La kyntu ia ki paidbah haba ki leit ban thep ia ka vote jong ki ki dei ban thep da ka jingluli lui, ka burom bad ka jingshisha. Ha kane ka sngi la batai ruh ia ka jingtrei kam jong ka Election Commission jong ka Ri India kumba ka long mynta.
Ka phang pdeng jong mynta u snem ban rakhe ia ka National Voters’ Day ka long “ Ka jingshemphang ki nongthep vote ka long ban pynkhlain ia ka synshar paidbah”. Halor katei ka phang la batai sha ki paidbah ban pynsngewthuh ba ka long kaba don kam ban leit thep vote ban pynkhlain ia ka synshar paidbah bad ban ioh ia ka jingsynshar kaba bit ba biang.
Ia ka jingshim smai ha kane ka sngi la pyniaid da u Syiem jong ka Hima Nongkhlaw u Pa’Im PM Syiemlieh. Ha kane ka sngi la sam ruh ia ki EPIC sha kito kiba dang shu ioh thymmai. Shuwa kane ka sngi ar sngi la pynlong ia ki jingiakop kiba bun jaid bad ia ki khusnam la sam mynta ka sngi sha ki nongjop.
