Shillong, Iaiong 03: Ka jingialap ilekshon na ka bynta kane MP ilekshon kaban long ha ka 11 tarik mynta u bnai ka dang sah sa hynniew sngi namar ka jingialap kan kut noh ha ka 9 tarik mynta u bnai shi sngi shuwa ban poi ka sngi thep vote.
Ha kine ki sngi la iohi ba baroh ki kyrtong na ki party bapher bapher bad ki kyrtong shimet ruh kila ia pyrshang ban pynksan ia la ki jong ki nia ki jutang ban khring ia ki nongthep vote bad ban ioh ia ka jingkyrshan na ki paidbah ha kane ka MP ilekshon da kaba pynlong ia ki ialap ilekshon ha ki bynta bapher bapher jong ka Ri Lum Khasi bad Jiantia.
Na ka liang jong ka party Congress kaba la pynieng ia u Bah Vincent H Pala kila ia ksiad ban ia leit kylleng kylleng ban pynsngewthuh ia ki paidbah, kum juh u kyrtong ka BJP u Bah Sanbor Shullai, u Dr Jemino Mawthoh jong ka UDP, u Bah Samuel Hahshah, u Bah Romeo Phira Rani bad u Bah THS Bonny ki kyrtong shimet ki ruh kila ia ksaid tyngeh ban khroh ia ki paidbah da ki jingialang kaba ki pynlong kylleng sawdong.
