Shillong, Jylliew 24: Ka Jaintia Hills Autonomous district council haka 24 tarik une bnai ka la sam paidbah ko iaki sanat sha ki waheh shnong jong ka Rilum Jaintia ha District library ha ka iadon lang ki 3 ngut ki MLA na Jaintia.
Ha kane ka sngi sam paidbah iaki sanat sha ki waheh shnong da ka jingdonlang u ma Sngawbha Dhar MLA ka Nartiang, u ma Justine Dkhar MLA ka Khliehriat, u ma Stephanson MLA ka Amlarem nalor ki MDC ka JHADC, ki waheh shnong ba bun naduh ki nongialam ka kynhun Ryngbah shnong ka Bri u hynniewtrep bad kiwei haka ialang bala pyniaid da u ma L.C.Ryngkhlem R.O.JHADC.
U ma Sngawbha haba u ai jingkren ha kane ka sngi ula pynpaw ka jingsngew kmen ia ki waheh shnong ka rilum jaintia namar ba kila ioh biang ki iaka bor na ka bynta ban peit iaka shnong ka thaw hadien ba la shah pynduh bor ki haka Meghalaya High Court ha snem 2014.
U la ban shuh shuh kato ka jingjia baroh ba shah pynduh bor haka High Court kala long pynban ka babha ,namar ba ki waheh shnong ki la kyndit bynriew mynta ban wad ki lad ki lynti ban ioh biang ha ka bor kaba kham skhem kaba don bad ki Ain bad ki kyndon.
Kamta ula kyntu u ia baroh ki waheh shnong ba kin pule bniah ki iaki kyndon kumjuh u pyndonkam hok ia ka bor katkum ki ain ki kyndon ba la buh iaki khnang ban lait na ka jah burom naduh ka shnong ka thaw ka council u doloi bad ia marwei marwei shimet.
U ma Justine, u ma Stephanson ruh ki da ai sngewnguh ia u Lad ka Jylla ba u la mynjur iakane ka Bill jong ka JHADC bad ki waheh shnong sa shisien biang ki la ioh ia ka bor, ki la kyntu ba ki katto katne ki bynta ka Bill ba dang duna kin shimkhia ban pynbeit kumjuh ruh ki waheh shnong ki MDC kin don ka jingiatrei lang na ka bynta ka bha ka miat jong ka jaidbynriew .
Iaka sanat la pyllait paidbah da u CEM JHADC ma Thombor Shiwat bad i la pule ruh iaki kyndon treikam ki waheh shnong da kaba kyntu ymdei ban iaid lait ia kine ki kyndon .Ha ka juh ka por u la pynbna ba kito ki waheh shnong ki bym pat ioh ia ka sanat ha kane ka sngi namar ba don ki bym biang ka rukom pyndap kot pyndap sla,bad don ruh kiba hap hapoh u pud ba kim pat pynbeit bha bad kiwei kiwei ki daw.
Iaki sanat ha kane ka sngi la lah ban sam tang kumba 108 tylli hapoh ki Elaka bapher bapher, ha ka la shim ia ka bynta da u Ma Sngawbha Minister ka tnat PWD, ki Arngut ki Parliamentary ka Jylla u ma Justine,ma Stephanson. Kiba na JHADC kynthup ia CEM Ma Thombor, u Dy.CEM A.A.Shulai, Chariman A.H.Darnei, Dy Chairman H.Bareh bad kiwei kiwei ki para MDC.
