Shillong ,Nailur 16: U Bah 
James Ban Basaiamoit u MDC ka Mawkhar-Pynthorumkhrah ula sam ia ki sharak sngi (solar lantern) sha ki 800 tylli ki longiing ia kaba la ioh mang kyrpang na ka Under Special Assistance scheme 2015-16 jong ka KHADC kaba long ka jingkyrkhu kaba khraw ia ki paidbah kiba duk. Ka jingsam ïa kine ki tiar ka dang dei ka Phase-II bad kine ki Solar Lantern ki shongdor T.3500 kawei bad haba kheiñ kyllum baroh ka la poi sha ka T.3 lak duna.
Ka jingsam ia ki sharak sngi sha ki 800 tam ki longiing kiba duk la pynlong ha St Joseph’s School Pynthorumkhrah ha ryngkat ka jingia don lang u Bah PN Syiem u CEM ka KHADC kum u kongsan,u Rangbah shnong ka Lum shyiap,Rangbah shnong ka Golflink bad ki paidbah ka shnong kiba la sakhi ia kane ka sngi.
Haba ai jingkren ha ka jingialang kum u kongsan u Bah PN Syiem u CEM ka KHADC ula ong,ka District Coucil ka leit ban ia kynduh ia ka sorkar kmie hadien ba ka sorkar NDA ka la pynduh noh ia ka fiance commission kaba ka District Council baroh ka ju ioh baroh shi katta hadien ka jingpyrshang ban leit wad ia ki lad jingiarap ka sorkar kmie ka la ai noh da ka Under Special Assistance.
Ula ong,kat kum ka kyndon ba la buh da ka sorkar kmie ka jingpyntrei kam ia katei ka skhim ka dei ban long tang ia ki jingtei bad ki MDC kiba la buh ia la ki jong ki jingtyrwa ka District level committee ka la ai jingmut ban pyntrei ia ki nala,ki footpath,ki iingskul bad kiwei kiwei.
U Bah PN Syiem ula ong, hynrei dei tang u Bah Ban uba la iohi jngai ia ka jingdonkam ki paidbah kiba ju shah ktah barabor na ka jinglip light ba khah khah kaba ktah bha ia ki khynnah skul khamtam ha ka por eksam kaba kum u nongmihkhmat ula buh ia ka jingtyrwa sha ka sorkar ban ai da ki sharak sngi.
