Shillong, Naitung 06: Mynta ka sngi ka party BJP kala pynlong ia ka jingsdang jong ka jingpynrung kyrteng ia ki paidbah kiba kwah ban rung sha kane ka party ha ka Ri India baroh kawei bad kum juh ha kane ka jylla Meghalaya.
Ban leh ia kane ha Shillong ia ka jingialang la pynlong hapoh ka ophis jong ka party BJP ha kaba u general secretary jong ka party ba dei peit iaka dong shatei lam mih ngi jong ka Ri India u Ajay Jamwal u la wan ban plie ia kane ka jingpynrung kyrteng ha Shillong.
Ha ka jingkren jong u ne u nongialam jong ka BJP, u la kyntu ia ki dkhot kiba don ha ka party ba kin long kiba treishitom namar ka dang don bun ka kam nangne sha khmat ba ka party ka dang hap ban pyndep, la ong ba ia kane lah ban leh da ka jingiatreilang jong baroh.
Ha kane ka jingialang la don lang u president jong ka BJP Meghalaya State Unit u bah Shibun Lyngdoh ki nongialam jong ka party u bah Sanbor Shullai MLA jong ka party bad ki nongkit kam jong ka party na kylleng jong kane ka jylla Meghalaya.
