Shillong, Naiwieng 30: Ki seng samla pule jong ki hynniew tylli ka jylla mynta ka sngi kila pynlong ia ka jingiakhih ha ki nongbah jong ki jylla kaba don ban pynpaw ia ka jingpyrshah ia ka Citizenship (Amendment) Bill, 2016 jong ka sorkar NDA ha Delhi.
Ha kane ka sngi u Chairman jong ka North East Student’s Organisation u la pynbha paidbah ha Shillong ba kin leit sha Delhi ban pynlong ia ka jingiakhih paidbah ban pynpaw sha ka sorkar India ia ka jingpyrshah ki briew jong ka North East katei ka Bill jong ka sorkar.
Ha nongbah Shillong ka KSU, kaba dei bynta jong ka NESO, kala pynlong ia ka jingialang paidbah ha Additional Secretariat ha kaba ki samla pule jong kane ka thain kiba don ha kane ka nongbah Shillong kila ia don lang. Haba kren ha kane ka jingialang u Bah Samuel Jyrwa Chairman ka NESO, u la ong ba ka sorkar pdeng kala leh bym suidniew ia kane ka dong shatei lam mih ngi jong ka Ri India.
Haba ia dei bad ka jingpyrshah jong ka NESO ia kane ka jingthmu jong ka sorkar pdeng ban wan rah ia ka Citizenship (Amendment) Bill, 2016 kala long naduh u snem 2016 bad ka NESO kala ia kynduh ruh ia ki dkhot jong ka Joint Parliamentary Committee (JPC) ban pynpaw ia ka jingpyrshah halor katei ka Bill.
Katkum kane ka Citizenship (Amendment) Bill, 2016 kaba la wanrah da ka sorkar pdeng, ka long ba ka Ri India da ka jingpyrkhat para briew kan shah ia ki, Hindu, Sikh, Jian, Buddhist, Jain, Parsi kiba don ha Afghanistan, Pakistan bad Bangladesh ba kin wan sha India.
Haba phai sha ka dong shatei lam mih ngi, ki jylla kiba ia jan eh bad ka Bangladesh ka dei ka jylla Tripura, Assam bad Meghalaya, lada ka sorkar pdeng ka pdiang ia kane ka Bill kan long ka jingmang kaba khraw ia ki riewlum ka dong shatei lam mih ngi jong ka Ri India, wat haba mynta kam don kata ka jingshah ia ki ba kin wan ruh ka NE kala shah ktah ha kine ki nongwan buhai shnong beain. Lada ia kane ka Bill la pdiang da ka iing dorbar ki riewlum kane ka thain kin sa kylla long ki rit paidbah hala ki jong ki jylla.
La ong ba ka sorkar India kala niew shiliang ia ka dong shatei lam mih ngi jong ka Ri India namar kala pyntrei kam ia ka ain yakjakor ka Arms Forces Special Power Act, ia kane ka ain ym shym la pyntrei kam ha kiwei ki bynta jong ka Ri India, lait noh tang ha Jammu bad Kashmir bad ha ki jylla North East ka NESO ka shim ba ka jingpyntrei kam ia kane ka ain ka dei ka jingniew bein ia ki paidbah ka North East.
Ki nongialam na ki seng samla pule kane ka thain, ka KSU, ASU, NSU, ASU, TSU, MSU, GSU, kine baroh kila pynpaw ba ka sorkar pdeng ka dei ban sngap ia ka jingdawa jong ki seng mala pule kane ka thain ban nym pyntrei kam ia ka Citizenship (Amendment) Bill, 2016, lada ka sorkar pdeng kaleh don bor khlem da sngap ia ka jingpynsngew ki paidbah kane ka thain, kata ka sorkar kaba hap ban shim ia ka jingkit kitkhlieh lada ka mih kano kano ka jinghuri hura ha NE.
Ki nongkren na ki nongmih khmat ia kitei ki seng samla pule ki dawa ba ka sorkar pdeng ka dei ban beh ia ki poiwer kiba la wan buhai shnong sha kane ka thain, hynrei kaba sngewsih ka long ba imat kane ka sorkar pdeng ka kwah ban thyngian shuh shuh iaki briew na bar Ri ba kin wan sha katei ka thain khang ba ki trai ri kin kylla long ki rit paidbah hala ka jong ka jylla.
