Shillong, Jymmang 12: U nongalam ka liang pyrshah u Dr Mukul mynta ka sngi u la buh ka jingkylli sha ei jah u myntri ba dei peit ia ka tnad khyndew halor kane ka jingjia ha New Balakhawa, ha kaba kim shym la iohi ba un kren ei ei halor kane ka jingjia.
Haba kren ha ki lad pathai khubor, u Dr Mukul Sangma nongialam ka liang pyrshah hapoh ka iing dorbar thawain jong ka jylla u la ong ba, kane ka jingjia baroh kadei ba kane ka sorkar kam shym don kano kano ka jingkit khlieh, u la buh ka jingkylli sha ei jah u myntri ba dei peit ia ka tnad khyndew, ki kwah ban tip aiu ka sorkar kala leh.
U Dr Mukul u la ong ba ka sorkar ka la dei ban tip ba kane ka jingjia ha New Balakhawa ha kaba u Secretary jong ka Hima Nongspung u Bah Michael Warjri u la shah kem ha ki pulit Assam kam dei kaba shu jia kumto, hynrei ka dei kaba la don ka jingiakynad, ha kum kine ki khep ka sorkar ka la dep ban buh ia ki lad jingiada.
Kane ka jingjia ha Balakhawa, ka kren shai kdar ba kane ka sorkar kala pyndem ia lade ha ka sorkar Assam, kumno ki pulit jong ka jylla Assam ki lah ban shu wan kem briew katba ki mon sha Assam bad register ia ka mukot duma ruh sha kawei ka jylla, kane ka long beain bad kaba long pyrshah ia ka riti synshar jong ka Ri.
Haba la mih kane ka jingjia kum ka party kaba don ia ka jingkitkhlieh ka jylla kila leit sha Balakhawa ha ka sngi saitjian ban tip ia ka jingshisha bad kaei kaba ki ki angnud ka long ban iohi ba ka sorkar ka dei ban leh ei ei ba kum kine ki jingjia kim dei ban jia.
Na ka liang jong u nongialam ka liang pyrshah u la kynnoh ba ka sorkar kam shym la leh ei ei ban iada ia ki briew ha khappud bad dei na ka jingbym shim khia jong ka sorkar ki paidbah ha khappud ki shah pynshitom ha rukom. Ka sorkar ka dei ban trei kam 24X 7 namar ka dei ka kam jong ka sorkar ba kan tip ia kaei kaba jia baroh.
Na ka liang jong ka liang pyrshah ka dawa na kane ka sorkar ba ka dei ban ia kren bad ka sorkar Assam ba ia u Bah Michael Warjri dei ban wanrah noh sha Meghalaya, u Dr Mukul u la ong ba ympat juh iohi kum kane ka sorkar ka bym don ka jingkitkhlieh ki shu kwah don ha ka bor khlem sngewthuh.
Haba ia dei bad ki kam pynroi ha khappud u la ong ba kala don ka jingiateh kular ha pdeng ki ar tylli ki jylla ba ki dei ban da ia pyntip lada dei ha ki jaka ba don ka jingiakajia, hynrei ha Balakhawa ka dei ka jaka jong ka jylla Meghalaya kumno ka sorkar kan shah ia ka sorkar Assam ban wan shan surok PMGSY.
Kane ka jingailad ka sorkar dei ban ia kane ka surok ka long ba ka sorkar kala long kumba leit ban aiti ia kane ka jaka sha ka jylla Assam, nalor ba ki don ki jaka ba don ha pdeng ka jingiaknieh lada jia kum kane ka jingjia ki jaka ka Meghalaya kin dang leit shuh shuh sha ka Assam. Haba ia dei bad ka jingia ka jia pud ka sorkar Assam kala paw shai kdar ba kam kwah ban ia pynbeit ia u pud ha pdeng ka Meghalaya bad ka Assam la ong u Dr Mukul.
