Sha ka BJP ne sha ka NPP? Da u Babu Kular Khongjirem

Katba nang mih ki sngi bad nang iai tyllun ka por sha ka MLA election 2018, katta ka nang ibang bad nang kham itynnad shuh shuh ka jing ialehkai politik (political game) ha ka state jong ngi. Dang shen ki kotkhubor ki report biria dei por ia ka jingshisha ba kito kiba kwah ban ialeh election hynrei ki bym ioh tiket nala ka party lajong ki kynriah ne ryngkang dieng kper noh  sha kiwei pat ki party bad  ki leit ngat lut sha ka jar thymmai PDF. Kito ki seating MLA pat kiba la shah beh ing, ki la sdang leit rung sha ka ing paki dulan jong ka BJP bad don pat kiba kwah ban leit sha ka ing jrong dieng jong ka NPP khnang ban lait na ka jing kyuih ne jing tieng ba la shah beh ha ki sing ne ki khla (ka congress ne UDP). Tang kine ar tylli ki ing (Party) kiba long ka jing shngain ia ki seating MLA ban leit shong, kata, ka ing paki dulan jong ka BJP bad ka ing jrong dieng jong ka NPP.

Ki khubor ha kine ki khyndiat sngi ki lynguh hi pum halor ka jing pyn duh pyndam noh (dissolved) ka seng congress ia ki katto katne ki block level bad ki nong kyrshan ba ju ieit ju thoin ia ka seng congress na kito ki block level kila pyn mih ka jing kren khohnioh ba laiphew jait ia la ka seng congress lajong. Ha ka jing shisha, ka seng congress ka long kum ka kmie jong ki kaba pyn heh pyn san bad pyn long briew ia ki kam ki jam jong ki baroh. Hynrei mynta pat kim don shuh ka jing sngew nguh sngew burom ia ka. Dei kum kane ka jinglong kein ba ka ktien ka ong ‘Mai pap ka bneng ka khyndew ia u bym sngewnguh’.

Ki seating MLA na ka congress ne UDP, etc bun kiba rai ban rung sha ka ing heh BJP bad don ruh kiba pyrkhat ban leit rung noh sha ka ing jrong dieng ka NPP. Ha ka jingshisha, ka BJP bad ka NPP ki dei ki juh namar ki ia don lang ha ka sorkar NDA ha Delhi bad ki pyn long ruh ia ka North East Democratic Alliance (NEDA) ha North East jong ngi. Don kiba pyrkhat ban rung beit (directly) sha ka BJP namar ba ka la kop lypa ban jop bun ki MLA da kaba pynbeij da ki buit bapher bapher nalor ba ka don ka bor ha Delhi (Central govt). Ki khein jem bad khein suk ia ki briew jong ngi namar ki long kiba tlot palat ha ka bor pisa. Kiba leh myn leh isih BJP mynshwa namar ba ka dei ka party kaba don bynta bad ki kynhun RSS, VHP, etc jong ki Hindu bad kiba pyrshah ia ka jing ngeit Kristan mynta pat ki leh myn leh sian ban leit iasnoh (indirectly) sha ka NPP. Kane ka jing leh sianti jong ki ban rung na kyrpong ing ka long ka kham ma pynban . ‘Na ka shyntur u khla, ha shyntur u thlen syndon’. Kumjuh ruh ‘Na ka nar ha ka ding syndon puk’.

Ka jing iaroh bad ka jing ieit thep mynsiem jong ki nong ialam congress ha block level kila kylla khongpong bad kylla baji lut khoit mar ia pyn duh pyn dam ka seng congress ia ki block level. Ka discipline party mynshwa kala kylla indiscipline party mynta. Ka party kaba bha tam kala kylla long ka party kaba sniew tam ia ki mynta. Mynshuwa ki iaroh ia ka party ba don high command mynta pat ka party high command kaba leh bakla lut bad leh donbor suda ia ki. Dei hangne kein ba ka ktien ka ong ‘U bym ai ia kaba kwah ngi khein uba sniew’. Mynshuwa ki bein ki khoh BJP, Modi, Amit Shah, RSS, etc mynta pat ki sdang ban iaroh bad pyn don burom ia ki. Ka long thik kum ba jliah biang ia ka prie lajong. ‘Uba pyn ap liew lep iakiwei khlem pep un ngat ialade’. Ka bai nong leh bein ia kiwei, mynta kane ka apot ka poi sha lade. ‘Lada phi leh bein ia kiba tlot, phin liem ha kiba kham khlain’.

Phi leh ne kren bein ia kiwei, kata , kan kyrtoh kylla sha lade. ‘ Ka nong kylliang kaba kham sniew ka ap ia ka ban snoh ha piew (sniew hapoh )’. Kaei kaei kaba phi leh ia kaba bha ne kaba sniew kata ka don la ka bai nong ne nong kylliang (in every action, there is an equal and opposite reaction). Ynda lah poi ha kum kane ka khep kein ba ki sa ong ‘La shong ruh jhieh, la ieng ruh kynduh’. Ym donkam ban babe ia kaba leh hi. Mynta sdang sa ka leit pyn beij biang ia ki paidbah ba lui lui (innocent people) da ki buit sianti ba laiphew jait lyngba u thylliej ba pait pnad ban pynum ia ka dohnud u paidbah khnang ban jop biang ia ka election 2018. Ki rukom pyn beij paidbah da kaba sam syntex, tyrpalin, pipe um, khamtam da ki bor pisa ba dang sah ka MLA scheme ka dang ai mynsiem ia kine ‘ki khlein la thang jwat la bam’.

 

 

What Next?

Recent Articles

Leave a Reply

Submit Comment
*