Shillong, Iaiong 07: Kala don ka jingpyndon kam bakla ia ka pisa kaba la thep da ki paidbah hapoh jong ka “Nongstoin Post Office” da u wei na ki nongtrei hapoh kane ka iing dak bad la kynnoh ba baroh ka pisa kaba la pyndon kam bakla kala kot sha ka T.40 lak tyngka.
Katkum ki thymmei khubor kiba ia jan bad ka GPO Shillong, ki iathuh ba kala don ka jingujor na ka liang jong ka ophis da ka FIR sha ki pulit haba ia dei bad kane ka jingbym biang ka jingkhein ha kaba ia dei bad ka pisa kaba la wan thep da ki briew hapoh jong ka Nongstoin Post Office bad kane ka pisa kaba khlem rung ha ki jingkhein kala kot sha ka T.40 lak tyngka.
Halor kane ka jingjia ki lad khubor ki iathuh ba ka ophis kala ai da ka jingujor sha ki pulit jong ka Nongstoin West Khasi Hills District bad halor kane ka jingujor na ka liang jong ki pulit kila kem ia u wei u nongtrei u ba la suba ba u don kti ha kane ka jingbym pynbiang ia ki jingkhein ia ka rukom thep Pisa.
Ki thymmei khubor ki iathuh ba ha ka jinglap kaba nyngkong na ka liang jong ka ophis kala shem ba ka pisa kaba khlem biang jingkhein ka dei T.35 lak tyngka bad ha dien ba la peit bniah la shem ba ka don ka jingbym biang jong khien T.5 lak tyngka bad baroh kala kot sha ka T.40 lak tyngka.
