Shah pyndik ka HYC ha ki pulit shuwa ban sdang ka jingialang ha Iew Rynjah

Shillong ,Nailur 16: Ban pynjur ia ka jingdawa Inner line permit (ILP) ka Hynniewtrep Youth Council (HYC) ka la pynlong ia ki jingialang paidbah ha iew Rynjah ban pynsngewthuh sha ki paidbah ia ka jingdonkam ban pyntrei kam ia kane ka ain kaba dei ka ain kaba khlain kaba lah ban teh la kam ia ka jingwan kyrthep ki mynder.

Ha shuwa ban pynlong ia ka jingialang ki dkhot jong ka HYC ki la shah khang ha ki pulit namar ba ki khlem da ioh jingbit na ki bor pyniaid District ban pynlong ia ka jingialang.Hadien katto katne kynta ba ki dkhot jong ka seng ki la ia kren,ki bor pyniaid District ki la ai jingbit ban pynlong ia ka jingialang kaba hadien ka la iaid beit khlem ka jingpynthud.

Naduh ba sdang jong ki jingiakhih ban dawa ILP ka HYC kam pdiang ia kiwei ki ain ba la pynbna da ka sorkar jylla ki ban teh la kam ia ka jingwan rung kyrthep ki mynder sha ka jylla khamtam ka Meghalaya Residents Safety and Security Act, 2016 kaba dei ka ain kaba tlot bor.

Ka HYC ka pynlong da ki jingiakhih bapher bapher ha kylleng ka bri u Hynniewtrep ban dawa pyntrei kam ia ka ILP da kaba wah ia ki lama iong,ka jingrah ia ki placard ha man la ki jaka ba ki minister ki leit plie ia ki kam pynroi, signature campaign,ka jingtar ia ki dur jong ki minister bad ka jingiaid kjat ba lai sngi lynter da ka lynti ba jai jai.

Wat hadien ba ka HYC ka la nang pynjur ia ki jingiakhih ILP da ki jingiakhih bapher bapher hynrei ka sorkar haduh kine ki sngi kam shym la khot ban ia kren bad kam patiaw ia ka jingiakhih jong ki samla kiba dawa ia hok ban iada na ka jingwan rung kyrthep ki mynder ri kaba ap ka jingma kaba khraw ia ka jaitbynriew baroh kawei.