Shillong, Iaiong 14: Ka thain Nongjri ka dei ka jaka kaba la tip kum kawei na ki jaka ba don ka jingiakhaii pateng bad ka Bangladesh kham tam ha ka export la bun bun snem hynrei ka jingeh kaba ki paidbah ki ia kynduh ka long ha kaba ia dei bad ka Bank.
Kane ka thain ka don lai tylli ki kad khaii sha Bangladesh, ka Borsora, Bagli bad ka Sherakaw, kane ka jingbym don ia ka Bank kala buh ia ki nongkhaii ha ka jingeh kaba khraw ha kaba ki hap ban rah da ka pisa ban siew ia ki nongbyllam yn tang kata ka buh ruh ia ki nongrah pisa ha ka jingma.
Ka Bank kaba jan eh na ka bynta jong ki ka dei ka State Bank jong ka Ri India ha Ranikor, hynrei kane ka Bank ruh bun sien ka don ha ka jingeh namar kam lah ban trei kam katkum ka jingangnud jong ki paidbah ha kaba ia dei bad ka siew ka tada haba ki paidbah ki don kam ban sei pisa.
Haba ia kren bad u SP News Agency bun n ki riew rangbah ka tei ka thain kila pynpaw ia ka jingeh ha kaba ia dei bad ka jingtrei kam namar kam don ka Bank. Kham mynshuwa kala don ka jingiakren halor kane ka phang hynrei namar ba kam don ka Police Station ym lah ban buh ia ka Bank.
Na ka liang jong ki riew rangbah katei ka thain kila pynsngew ba mynta kala don ka Police Station ha Nonghyllam kala dei ka por ia ka sorkar ba ka dei ban ia kren noh bad ki bor pyniaid jong ki Bank ba kin plie noh ia ka shnat trei kam jong ki ha katei ka thain.
Katei ka thain baroh kawei ka don haduh 16 tylli ki shnong sawdong jong ka shnong Nongjri bad ka dei ka pdeng ia baroh ki shnong namar ka don ka iew ha kane ka jaka. Ki paidbah ki angnud na ki nongmih khmat khamtam u MLA jong kane ka jaka bay n leh shitom ba ka dei ban don ka Bank ha katei ka thain jong ka South West Khasi Hills District.
