Shem jingeh kiba duna ka jingïohi ba ki paidbah kim pat tip shaphang u diengduh lieh

Shillong, Risaw 16: Shem jingeh kiba duna ka jingïohi naka daw ba ki paidbah kim pat tip shaphang u diengduh lieh la bynñaw u ma Rimiki Pajuh uba la pynïaid ïa ka jingïalang ban pyndonburom ïa ka sngi ka jingïada ïa kiba bat ïa u diengduhlieh. Ki nongñah taksi bad wat ki pulit pynïaid kali ruh kim pat bna eiei ruh em shaphang u diengduh lieh la kynnoh ki briew kiba don ka jingduna haka bor jingïohi.

U diengduh lieh u dei u paralok ba nyngkong jong kito kiba don ka jingduna haka bor ka jingïohi bad u dei u dak ba pynithuh ïa ki haba ki ïaid ki ïeng ka dei ka sur kaba mih na kiba wan sha kane ka jingïakynduh. U diengduhlieh u dei u paralok bym ju shet kylla la pynwan dur u samla Raju Maring uba duna ka bor ka jingïohi haba u pule ïaka poitri kaba ula thaw kyrpang ban pyndon burom ïa kane ka sngi.

Ki briew kiba don ka jingduna ha ki dkhot met bad khamtam kiba duna bad ym don ka bor ka jingïohi ki duh noh la ka hok katkum ka riti synshar namar ba ka sorkar kam lah ban pynbiang ïa ki jingdonkam jong ki.

Kum ka nuksa ki lynti ki syngkieng kim biang bad wat ki ophis sorkar ruh kum long satia kiba suk na ka bynta kito kiba don jingduna ki dkhot met. Bunsien wat ki briew ruh kim don satia ka mynsiem ïarap, namar kata ka dei ka imlang sahlang kaba don haka jingduna ym dei ma ngi la ong u ma Rimiki Pajuh uba ki khmat jong u ki matlah.

U ma Jitendra Dkhar uba long u Director jong ka Blind Lead Trust u ong ba katkum ka khanasamari jong u snem 2011 ka jingdon jong kiba duna ka jingïohi ki don haduh 13, 532 ngut hapoh ka jylla. Ula ïathuh ruh ba ki don ki khep ba kiba don ka jingduna haka jingïohi ki shahknieh mobai phone ne shah kloh pla ha ki riewsniew haki ïew ha sor.

Namar kata u ong ba donkam ban don ka añ ban ïada ïa ki briew kiba pyndonkam ïa u diengduhlieh. Ula ong ruh ba teng teng ki nongñiah kali arshaka kim patiaw bad ki leh bym suidñew wat haba ki ïohi ïa ki briew kiba pyndonkam ïa u diengduhlieh ki ïaid ha surok.

Ka Repanlin Lyngdoh kaba pule MSW haka St Edmunds college, Shillong kaba don ka jingpang kala batai bniah shaphang kumno ka la ïoh ïa kane ka sngi pyndoburom ïa ka World White Canes Safety Day man ka 15 tarik u Risaw jong kano kano ka snem.

Ka kong Belbora Wankhar iba long ka  secretary jong ka seng ki Parent of children with disability ila ong ba ka sorkar kala dei ban shimkhia bha ïa ki jingdonkam jong ki briew kiba im bad ka jingduna ha ki dkhot met.

Kala ong ba ka sorkar kala dei ban wan rah ïaka polisi hapoh ka Assembly wan khmih kyrpang ïaka jingdonkam jong ki briew kiba don ka jingduna haki dkhot met ba khamtam kiba duna ka bor ka jingïohi. I ong ba ki jingïarap ïa ki briew kiba duna ki dkhot met ka dun bha.

U Dr H.H. Mohrmen uba long u nongshah khot sngewbha ha kane ka sngi ula ong ka sorkar jylla kaba mynta bad ki sorkar kiba mynshuwa ki leh klet bad leh bymsuid niew ïa ki nongshong shnong kiba don ka jingduna ha ki dkhot met.

U ong ba ka sorkar ka khlem kynthuplang ïa ki (not inclusive) haba ka sdang ïa ki skhim ne ki project ban ïarap ïa ki paidbah. U pyni nuksa ïa ki skhim FOCUS ne Skill Development jong ka sorkar jylla kiba ym don satia ka jingbuh kyrpang ïa ki briew kiba don jingduna ha ki dkhot met.

Ula ïathuh ban aka liang jong ka SURE kala buh ïa ka jingtyrwa ban sdang ïaka training ha Moosakhia ha kaba u ma Kelvin Suting uba long ua Master Craftsman  u bym lah ban ïohi un hikai ïa ki nongshah hikai kiba ym lah ïohi, pynban haduh myta ka sorkar kam pat pdiang satia ïa kata ka jingtyrwa. U ong ba u kwah ban ïohi ba kiba duna ki dkhot met kin long laitluid bad ba kin ym hap shaniah shuh ha kiwei kumba long sha ki ri bashai.

Ka kong D.T. Syngai kaba long ka ADC jong ka West Jañtia Hills District haba kren kum ka kongsan ha kane ka sngi kala ong ba na ka liang jong ka sorkar ka leh shibun ki kam ban pynsuk ïa kiba don ka jingduna haki dkhotmet, hynrei ki dang don shuh shuh shibun kiba dang dei ban leh. Lyngba ka SSA la wan rah shibun ki jingïarap ïa ki khynnah kiba don ka jingduna ha ki dkhot met.

Ki ilekshon nangne sha khmat kin long kiba pynsuk ïa ki don ka jingduna ha ki dkhot met. Ka kong Syngai ka pynpaw ruh ka jingsngewkmen ba ka kynhun tem jong kiba don ka jingduna haka khmat kaba ïalam da u ma Micky Pajuh kaba la ai kyrteng ka “Life After Dark” kala shah jied naka Election Commission ban mihkhmat ïa ka jylla sha Delhi.

Ha kane ka sngi la ïoh ruh ïaka jingkren na u ma Wympherheimonki Lamare uba long u acting Secretary jong ka Seng Blind Lead Trust. Kiwei pat kiba la kren ha kane ka sngi ki dei ka kong Bandwina Khymdeit bad u ma Kajentan Lypon kiba long ki dkhot jong ka seng. Ha kane ka sngi la ïoh ruh ïa ka jingrwai na ki ba don ka jingduna haki khmat bad ka jingshad naka Josila Makdoh kaba ym lah satia ban ïohi.

Hashwa jong ka jingïalang kaba la long ha Indoor Stadium jong ka Dorbar Shnong Ladthalaboh, ki dkhot kiba don ka jingduna ka bor jingïohi ryngkat bad ki volunteer bad ki paralok kila pynlong ïa ka jingïaid rally kaba la sdang na Stand War, Mynthong, Jowai haduh ha Ladthalaboh.

Ha kane ka sngi la wan ïarap bad synran ruh da ki samla pule na Thomas Jones College bad Kiang Nangbah college kaba kynthup ïa ki NCC jong ka Thomas Jones college.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet