Shillong, Jylliew 17: Ka shongknor jong ka Meghalaya State Commision for Women (MSCW) ka kong Phidalia Toi kala kynnoh ba ha ka jingkhot hajir jong ka commissioner ia ki pulit jong ka Rynjah halor ka jingshah pyniap ki ar ngut ki khynnah hala u kpa dei na ka daw jong ka jingleh klet ki pulit iala ka jong ka kam.
Haba kren ha ki lat pathai khubor mynta ka sngi ka kong Toi kala ong ba na ka liang jong ka Commission kan sa phah ia ka jingujor sha u myntri kam poh iing bad sha u Director General ki Pulit halor katei ka jingjia ba sngewsih.
Ka kong Toi kala iathuh ba mar ia tip ia katei ka jingjia ba sngewsih kila leit sha katei ka iing ban sngewlem bad na ka commission kala ai jingiarap, ka jingshim por jong ka commission ban shim ia ka jingtohkit ka long namar ba ki hap ban sngewthuh ia ka jingjia ba haduh katno ka ktah ia kiba ha iing.
Ka kong Toi kala iathuh ba ha ka 27/5/2022 u ba pyniap ia ki khun u la shah ia la ka jong ka lok mynstep ha khmat ki paidbah shuwa ba kan leit trei bad kila ujor sha ki pulit hynrei ki pulit kim shym leh ei ei, ha ka jingshisha lada ki pulit kim ioh ia ka ejahar ruh kila dei ban ai da ka “Domestic Information Report” ia kane ruh ki khlem leh.
Ha ka miet 30/5/2022 haba ki ujor sha ki pulit ba jah ki khun na ka liang jong ki pulit kim shym la wat ha kato ka juh ka por ba ki ujor, hynrei la bthah ba kin wan ha dien 24, ki pulit kim shym la iarap ha kane ka bynta.
Wat la ki paidbah kila lap ia ka met jong ki khynnah ha ka 1/6/2022 haba la pyntip sha ki pulit kila poi slem sha katei ka jaka bad ia u kpa ruh la kem da ki paidbah bad aiti sha ki pulit, katkum ka jingiathuh la ong ba u la juh shoh bad dat ia ka man la ka por.
