New Delhi, Jymmang 03: U myntri khynnah ka sorkar pdeng ba dei peit ia ka dong shatei lam mih ngi jong ka Ri India u Dr Jitendra Singh u la ong ba shen yn tei ia ka jaka ai jingtip ia ki riti dustur jong ki briew ka dong shatei lam mih ban buh ha nongbah Delhi.
U la ong ia kane hadien ba la pyniaid ia ka jingialang halor ka “roadmap for implementation of Cabinet Approval of Schemes for North East Council” kaba la long mynta ka sngi ha kaba u Secretary, Ministry of Development of Northeastern Region (DoNER) Naveen Verma, u Secretary North Eastern Council (NEC) Ram Muivah bad ki heh ophisar jong ka ministry ki la iadonlang ha kane ka jingialang. Ha kane ka jingialang la iakren halor ka jingiaid ka jingpyntrei ia ki projek bapher bapher ha ka thain shatei lammihngi.
Namar ba ka sorkar pdeng ka la phaikhmat kyrpang sha ka thain shatei lammihngi, u Dr Jitendra u la ong ba kane kan long ka jingai sngewbha ba thymmai sha ki briew jong ka thain shatei lammihngi jong ka ri. U la ong, ka centre kan long kum ka jaka ha kaba yn lah ban pynlong bun ki jingialang ba iadei bad ki kolshor bapher bapher jong ki jylla ka thain shatei lammihngi kaba lah ban ioh ruh ki jingtip ba kham kyrpang shaphang kine ki kolshor ka ban don ha Delhi. U la ong ba la tei ia kane ka centre ha ka jaka kaba 1.32 acre ha Sector-13, Dwarka, New Delhi hapoh ka North Eastern Council (NEC) na ka bynta ban tei ia North Eastern Cultural and Information Centre.
U la ong ba kane ka Centre kan long ka jaka ha kaba yn lah ban pynlong bun ki jingialang ba iadei bad ki kolshor bapher bapher jong ki jylla ka thain shatei lammihngi kaba lah ban ioh ruh ki jingtip ba kham kyrpang shaphang kine ki kolshor. Une u myntri jong ka sorkar pdeng u la ong ba kane ka centre kan don ia ka library kaban don lang bad ka jaka pule ryngkat ki jingdonkam shaphang ka thain shatei lammihngi, kan don ruh ka art gallery ban pyni shaphang ka thain shatei lammihngi, ka Exhibition hall, Research centre, ki Sale outlet kumjuh ruh ki guest house.
U la ong, ia ka jingsaindur bad pynwandur iakane ka projek ka dang iaid shakhmat. La khmih lynti ba kane ka projek yn pyndep kloi katba lah ha ka jinglut kaba T. 50-55 klur, u la bynrap. U la ong ba kane ka Centre kan long kaba nyngkong kaba kum kane ha ka ri.
Da kaba buh jingmut ia ka jingbun ki samla pule ka thain shatei lammihngi kiba pule ha ki jaka pule bapher bapher, la shna ruh ia ki hostel na ka bynta kine ki samla pule jong ka thain. Ia kine hostel la shna ha Jawaharlal Nehru University (JNU) bad ka hostel tang ia ki samla pule kynthei na ka thain shatei lammihngi ha Bengaluru University.
