Shillong, Jylliew 05: U Myntri ba dei peit ia ka tnad ka koit ka khiah u Bah AL Hek mynta ka sngi u la iathuh ba ha dien shitaiew ynda la dep buh ia ki kor ki bor ka jaka test hapoh Pasture Institute ka jylla kan sa lah ban test COVID-19 haduh 800 ngut ha ka shi sngi.
Haba kren ha ki lat pathai khubor u bah Hek u la ong ba ia mynta hi dang lah ban test tang 400 ngut ha ka shisngi, kata ha Tura bad NEIGRIHMS bad ka jaka test hapoh Pasture Institute dang shna mynta bad hapoh shitaiew yn sa lah ban pyndep ia kane ka jaka test.
La iathuh ba kane ka jaka test hapoh Pasture Institute ka lah ban test haduh 400 ngut ha ka shi sngi, la ong ba ynda la dep kane ka jylla kala lah ban test haduh 800 ngut ha ka shi sngi.
Haba ia dei bad kito kiba pynkhein ia ka Home Quarantine na ka liang jong u myntri u la ong ba kin shah pynshitom hapoh ki kyndon jong ka Pandemic Act, haba ia dei bad ka jingkynnoh ba kam biang ka jaka sah ha Mukhla ia kane ka sorkar kam shym ioh jingtip ei ei.
