Shillong, Nohprah 21: U myntri rangbah ka jylla u Dr Mukul u la iathuh ba ka kabinet mynta ka sngi ha dien ba kala ioh ia ka jingkyrpad na ka seng ki nongdie kyiad phreng, ka tnad Excise kala wanrah ia ka jingiakren hapoh jong ka kabinet ban pynduna noh ia ka dor jong ka kyiad Indian made Foreign Liquor (IMFL).
Haba kren ha ki nongthoh khubor u myntri rangbah u Dr Mukul Sangma u la ong ba la shim ia kane ka rai ka long ban wanrah ia ka jingiabiang ka dor bad kiwei ki jylla khamtam eh bad ka jylla Assam ka jylla kaba marjan.
Ka jingpynduna ia ka dor ka long ha ka shisynduk, kane ka jingpynduna ka long ba ki don ki kyiad kaba ka jingduna kan long T.25 /- shisynduk, ki don kiba T.150/- ki don kiba T.200/- ki don kiba T.500/- tyngka bad ki don kiba T.1500/-
Na ka liang jong u Dr Mukul u la ong ba da kane ka jingpynduna ka don ka jingkyrmen ba ka jingioh lum khajana kan kham bun.
