Shillong, Lber 07: U lamphrang jong ka iing dorbar jong ka KHADC u bah Pynshngianlang Syiem u la pynbna hapoh ka iing dorbar ba u Bah Teinwell Dkhar u la jop ia ka kam Chief Executive Member hapoh jong ka KHADC khlem da don ba ialeh pyrshah.
Da kane ka jingjop khlem da don ba ia leh pyrshah u Bah Teinwell Dkhar MDC jong ka Shella Konstitwensi na ka party UDP u ba la jop saw sien lynter u la long u CEM ba 40 jong ka KHADC.
Ha ka jingkren ai khublei ia ki para MDC kiba la kren halor kane ka jingjop jong u kum u CEM mynta ka sngi, u la ong ba ka jinglah ban trei kam, ym don kam haduh san snem, hynrei wat tang 6 bnai ruh kala biang.
Kane ka jingkren jong u Bah Teinwell ka long ban jubab ia ka jingkynthoh na ka liang pyrshah kaba la long ba kim kwah ban iohi ia u kum u CEM tang shisnem hynrei ki kwah ban iohi baroh san snem, namar la iohi ba u CEM ba mynta yn long tang shisnem kumba la paw ha ki lad pathai khubor.
Ha kane ka sngi u CEM bala shah jied u la ong “ Ngan pyniaid ia ka Executive Committee” khlem ka jingsheptieng bad baroh ka jingia ai jingmut kan long na ka bynta ka jaidbynriew, shuh shuh u la ong ba ha ka jingiohi ka jong u ka District Council kala dang hiar. U la ong ba ka thong kaba ha khmat eh ka jong u ka long ban pynkhlain ia ka District Council.
Na ka liang jong u CEM u la ong “ba lada bakla ka KHADC kam dei ka jingbakla jong nga, hynrei ka dei ka jingbakla jong baroh ki MDC, kumta nga kyntua ia baroh ban ia treilang ryngkat ryngkat na ka bynta ka jingbha jong ka District Council.
Kiba la ia shim bynta ha kane ka jingkren ai khublei mynta ka sngi ki long u nongialam ka liang pyrshah u bah Lamphrang Blah, Bah Pyniaidsing Syiem, Bah Titosstarwell Chyne, Bah Karnes Sohshang, Bah Paul Lyngdoh, bah Latiplang Kharkongor, bah Lambor malngniang, bah Teiborlang pathaw, bah Ronnie V Lyngdoh, bah Martle Mukhin, bah Alvin K Sawkmie, bah PN Syiem Chairman jong ka KHADC bad kiwei dei.
