Shillong, Risaw 15:U Bah Pyniaid Sing Syiem, MDC ka Sohryngkham constituency u la ioh ban pyllait paidbah ia ka phlim “Thong iong nga” kaba la long ha Shillong Club. Ha ka juh ka por u la kyntu ia ki nongshna phlim ban shna iaki phlim jong ki nongialeh lait luid.
Ha kane ka sngi u bah Pyniaid Sing Syiem u la shim kum u Kongsan ha jaka jong u bah Prestone Tynsong, MLA ka Pynursla Constituency ha ka jingiadonlang ryngkat u bah Bisonroy ïano, MDC Raliang constituency, u bah Kyrmen Shylla, kyrtong ka UDP na Khliehriat constituency bad la pyniaid ia ka jingialang da ka kong Wanri Pyngrope bad u Golden Suchiang kiba dei ki tyngshop bad puron ki phlim Khasi Pnar.
Haba ai jingkren ha kane ka sngi u bah Pyniaid Sing Syiem u la ong u Blei u la ai shisha ia ka maring kaba itynnad ia ka rilum Khasi kat haduh ba ki phlim Bollywood ki la wan hiar sha kane ka jaka ban ring ia ki phlim jong ki.
U la ong da ka jingkiew ka kam shna phlim la kyntiew ruh ia ki samla ban ioh ban iashim bynta ban pyni ia ki sap ki phong jong ki. u la kyntu ia ki nongshna phlim ba kin shna ia ki phlim ia ki riew ialeh laitluid bad kiwei de ki phlim kiba dei bad ka jinglong kyrpang ka jaidbynriew.
U Bah Pyniaid u la iathuh ba wat ka KHADC ruh ka la mang pisa haduh shi klur ha ka tnad Arts and Culture ban kyntiew ia ka sap rwai, ka tem ka put bad kiwei de.Ha kane ka sngi la ioh ruh ban pyllait ia ka trailer jong ka phlim bad la ioh ruh ban pyni ia ka phlim baroh kawei kaba neh palat 3 kynta duna ha kajingiadonlang ki nongiashim bynta bad ki nongshah khot sngewbha.
Kum ka dak ban pyni ba la pyllait u bah Pyniaid u la ot ia u kek bad pyntian artad ia ka kong Simi Khongtiang.
