Shillong, Naiwieng: U Lamphang ka iing dorbar thawain ka jylla u bah Metbah Lyngdoh la ong ba dei ha ka Balang ba u la ioh pdiang ia ka shithi na ki 12 MLA ka party Congress ba kila mih bad leit ban pyniasoh bad ka Trinamul Congress.
La pyntip ruh ha ka juh ka por na u Secretary ka party TMC ba kum ka party kala pdiang ia kine ki 12 ngut ki MLA ba kila pyniasoh sha ka party TMC, u Lamphang ka iing dorbar u la pynthikna ba u la ioh pdiang ia ka shithi na u Secretary ka party TMC kaba pdiang ia ki 12 ngut ki MLA sha ka party.
Haba kren ha ki lait pathai khubor ha dien bala ia kynduh ia ki 12 ngut ki MLA kiba la mih na ka party Congress, u bah Metbah la ong ba ha dien ba u la ioh pdiang ia ka shithi na ka 12 ngut ki MLA, u la khot ia ki ba kin wan ia kynduh mynta ka sngi ha kamra trei kam jong ki.
Kane ka jingkhot ia ki mynta ka sngi ka long ban pynthikna ba kila soi ia ka shithi bad mynta ka sngi la phah soi biang ha khmat jong nga ban pynshisha ba kila soi ia ka shithi bad katkum ka ain ka khyrngit kaba shiphew kila lah ban pynbiang katkum ka ain kila pynbiang hynrei dang don ki bynta ban hap ban bishar bniah shuwa ban shim ia ka rai.
U Lamphang ka iing dorbar u la ong ba kam shym don ka jingbuh por hynrei un leh ban shim ia ka rai kham kloi, la ong ba ia ka shithi u dang ioh ha ka Balang bad mynta ka sngi u dangkhot ia ki 12 ngut ki MLA bad dang shudep ia kynduh mynta bad kumta u dang shimpor ban pyrkhat shuwa ban shim rai.
U Dr Mukul haba kren ha dien bala ia kynduh ia u Lamphang ka iing dorbar la ong ba kane ka jingiakynduh ka long ban pyndep katkum ki kyndon kiba la buh katkum ki kyndon kiba don ha ka khyrngit kaba shiphew.
