Shwa ban kut u 2021 yn pyndep noh ïa ka Sohra Market Complex: Gavin 

Shillong, Kyllalyngkot 19: U Bah Gavin M Mylliem, MLA ka Sohra Constituency u la pyntip ba ka jingtei ia ka G+3 building ka Sohra Market Complex yn pyndep noh ha shwa ban kut une u snem 2021 bad kumba long mynta ka jingpyntrei ia kane ka projek ka la iaid shaid shaid sha khmat.

Haba kren ha ki nongthoh khubor hadien ka jingwan jurip ia ka jingtrei ia kane ka Market Complex, u Bah Gavin u la ong ba ia kane ka projek la mang tyngka na ka tnad Tribal Affairs ka Sorkar Pdeng ha ka mang pynlut kaba long T. 4 klur tyngka.

“Kane ka dei ka G+3 building ha kaba ka mala ba hapoh kan dei ka jaka ïeng kali”, la ong une u MLA ia uba la wan ban ia synran lang ha kane ka jingjurip da u Project Director, DRDA East Khasi Hills, u Paiem Freeman S Syiem, Syiem ka Hima Sohra, ki dkhot ka Executive Committee ka Hima Sohra lem bad kiwei.

U la ong ba kane ka Complex kan don kumba 70 tylli ki basa (stall). “Kan long ka jingmyntoi kaba khraw ia ki nongshongiew ha Iew Sohra bad kin lait na ka lyer u slap khamtam ha ka por lyiur kumba ngi tip ba ka thaiñ Sohra ka dei ka jaka ba jur slap tam”, la ong une u nongmihkhmat.

U la ong na balor ka jingkhuid jingsuba kane ka Complex kan long ruh ka jingtei ka ban pynitynnad ia ka Ïew Sohra kaba dei ka jaka kaba ki nongwan jngohkai pyrthei ki rung ki mih shwa ban leit jngoh ia ki jaka ba itynnad ha ka thaiñ Sohra.

Kane ka Market Complex kan dei ruh ka jingïaleh ban pynkylluid ia ka leit ka wan ha ka Ïew Sohra. U Bah Gavin u la pynpaw ka jingai khublei ia ki ophisar, u Syiem bad ka Dorbar Hima Sohra kiba la ai ka jingïatreilang bad ki bor Sorkar ban pynurlong ia kane projek kaba shen ki paidbah nongshong kin ioh jingmyntoi, la ong u MLA ka Sohra.

What Next?

Recent Articles

Leave a Reply

Submit Comment

*