Shillong, Nailar 06: Ka KHNAM State Youth Wing Ryngkat ka KHNAM Mawlai Circle kala kynduh ia ki nongtrei ASHA haka 05-08-17 ha Mawlai Basic School ban ia kren halor ka jingeh jong kine ki nongtrei ASHA ki ba la trei shitom ban wanrah ia ka koit ka khia sha u paidbah.
Ha ka jingialang la dong ryngkat U President ka State Youth Wing Bah Thomas Passah, U Chief Organiser ka KHNAM u ba long ruh u kyrtong ka KHNAM na Mawlai constituency haka election 2018 Bah BL Nongbri, U Secretary jong ka KHNAM Mawlai Circle Bah Freewelson Marpna bad kiwei kiwei haka jing ia don ryngkat ruh I Kong Happy Pyrtuh ka President jong ka Union ki nongtrei Asha ka jylla Meghalaya ryngkat ki ba bun ki nongtrei Asha.
Hadien ka jingia kynduh ka KHNAM ka pynpaw ka jingsngew khia hadien ka jingioh jingtip ba ka jingsiew sha kine ki nongrei Asha ka long tang Shi hajar tyngka. Ka Jylla Meghalaya ka don haduh 6000 tam ki nongtrei bad 300 eiei ki supervisor jong ki nongtrei Asha ki ba ai ka jingshakri sha u paidbah. Ka kam kaba kine ki nongtrei ki trei ka long shisha kaba khia khamtam ba ki iaid na kawei ka jaka sha kawei pat sha man la ki thliew iing ban sam ia ka jingkoit jingkhiah.
Kine ki dei kiba trei lyngba ka NRHM bad wat la kidei ki Voluntary Employee ka jingsiew duna palat kaba tang 1000/- ka la ktah ia ki long iing long sem jong ki. Bad ngi tip shai ba ka sorkar jylla ka donkam ia ka shakri jong kine ki nongtrei Asha ban pynthikna ba ki paidbah kin tip bad kin ioh ia ka jingkoit jingkhiah ba pura. Ka KHNAM ka dawa jur ia ka sorkar jylla ba kan phai khmat bad ban shim khia ia ka jingeh jong ki ASHA, ka seng kan dang iai buddien halor kane bad ka sorkar jylla pdeng bad sorkar pdeng kumjuh.
