Jowai, Lber 19: Ka AJYWO Central Body na ka bynta ka bha ka miat jong u paidbah nongleit nongwan bad ki nongshnong-shnong ba don markhap lyngba u surok NH 44, ka kyntu ia ki bor district ka West haduh East Jaintia Hills District ban pynsted noh ia ka jingpynlait noh ia ka compensation sha baroh baroh kito ki trai jaka trai iing ba don ha shilynter jong u NH 44 naduh Soomer, WJHD haduh Malidor, EJHD khnang ba ka GR Infra Project Ltd kan ioh pyndep kloi noh ia ka jingpynshna ia ka surok NH 44 na ka bynta ka bha ka miat jong u paidbah nongleit nongwan lyngba u tei u surok bad khamtam eh ia ki shnong ba don shilynter ha baroh arliang jong utei u surok khnang ban lait na ki jingjia ba sngewsih ia ki paidbah.
“Kat kum ba ka long mynta, hoid ka jingpyntrei ia u NH 44 ka la iaid shait shait bad u paidbah u la kham suk shi katdei eh ha ka leit ka wan hynrei kaba sngewdiaw pat ka long ba ka jingbym pat lah jong ka sorkar lyngba ki District Administration ban pynlait noh ia ka bai khyndew sha ki paidbah, ka la pynlong ia katei ka company ban ym pat lah ban ktah ia ki bynta jong katei ka surok kiba don ha ki Khap Shnong bad sdang shwa ban trei tang na bar phyllaw lane kynroh iing jong ki briew.
Kane ka jingtrei kaba kum kane, lada ym lah ban pynbha ia ka kham kloi, kan sa wanrah ia ka jingma jingmynsaw kaba jur bha ia ki paidbah nongleit nongwan da ka kjat bad khamtam ia ki nongshnong jong kito ki shnong kiba don baroh arliang jong katei ka surok namar ki nongshnongshnong lane ki paidbah kin hap beit ban mih na iing na sem bad iaid halor utei u surok na ka bynta ki jingdon kam jong namar ba ym don side-berm shuh kaba ki shait pynlong la baroh shi katta kum ka jaka iaid kjat ha ki shnong jong ki bad kane ka rukom kaba kum kane kan sa wanrah beit ia ki jingjia ba sngewsih ia ki paidbah ha man la ki por”, ong u Bah M H Dkhar President jong ka AJYWO Central Body.
U Bah M H Dkhar u la ong shuh shuh “Ka long ka ba ym lah da lei lei ruh em ban pdiang ba ki briew bad ki kali kin iaid lang ha u surok highway. Kumta ka seng ka kyntu jur ia ki bor district ha Jaintia Hills ban pynkloi noh ia ka compensation sha ki paidbah khnang ba ka company kan ioh ban pynsted noh ia ka jingtrei ha ki jaka ba don shong briew bad ki jaka paidbah ba khapngiah kum ka Phramer, Lad-Rymbai, Khliehriat, Umkiang, da kaba bteng noh sa ia ki lynti iaid kjat ha katei ka surok na ka bynta ki paidbah nongleit nongwan, lym da kumta kane ka surok kan sa wanrah beit ia ki jingjia ba sngewsih nangne sha khmat ha ki shnong briew bad ki jaka ba khapngiah ba don markhap bad ka surok.
“Ka seng ka kyntu ruh ia ka company GR Infra Project Ltd ban pynsted ia ka jingpyntrei ia kane ka surok ha kito kito ki jaka ba la lah ban pyntrei ia mynta na ka bynta ban pynsuk shwa ia u paidbah nongleit nongwan namar ia mynta, ka por kam don shuh. Lehse, lada jia ba u slap u kham slem ban wan ka company ka lah ban ioh por satang shibnai shiteng ne duna ban trei ia ia kane ka surok hynrei lada u slap pat u wan kloi pat te ka company kan ym lah leh eiei shuh hadien kane namar ka lyiur kan ym map shuh ia ka bad u paidbah un sa shitomha ka leit ka wan” la la bynrap shuh shuh u Bah Dkhar.
U Bah Dkhar u la pynkut da ka ba ong “Ka seng ka kyntu ruh ia ka GR Infra Project Ltd ba ia kito ki bynta ba ka la dep siang rong mynta ha kiba ki ki kali ka la lah ban pynher sted ka dei ban buh noh ia ki temporay/permanent jingkdew (signboard) ha man la ki jaka ba i don jingma ia ki kali nongleit nongwan bad ruh ia ki speed-breaker ha man la ki jaka paidbah ba lah ban don marjan ba u tei u surok kum ki skul, iingmane, bad kiwei kiwei de khnang ban iada na ki jingjia ba sngewsih. Shen na ka liang jong ka seng kan sa thoh sha baroh ki bor ki ba dei khmih ia kane ka surok ha ka jingiadei bad kane bad ruh bad kiwei kiwei de ki mat kiba iadei ba ka surok”.
