Shillong, Iaiong 20: U myntri ka tnad ka koit ka khiah u Bah AL Hek haba jubab ia ka jingkylli jong u Dr Azad Zaman haba ia dei bad ka Medical College ha Tura, na ka liang jong u myntri u la iathuh ba ka sorkar pdeng kala ai pisa T.50 klur ban sdang ia ka jingtrei na ka bynta ka Medical College ha Tura.
Na ka liang jong ka Agatha Sangma, kala buh ka jingkylli hato ka dei shisha ne em ba la buh Mawnongrim ar sien ha kaba ia dei bad kane ka Medical College, na ka liang jong u myntri u la jubab ba ka dei ka jingshisha ba la buh mawnongrim ar sien ia kane ka juh ka Medical College, kaba nyngkong ha u snem 2012 bad kaba ar mynta u snem 2018.
Na ka liang jong u myntri u la jubab hapoh jong ka iing dorbar ba ia ka Medical College ym shym al lah ban sdang ha ka jaka bala buh mawnongrim nyngkong namar ba kam iahp bad ki kyndon kiba la buh da ka Medical Council jong ka Ri India. Na ka liang jong u myntri u la iathuh ruh ba ka pisa kaba la ioh pdiang kam dap na ka liang jong ka tnad ka koit ka khiah kala pan pisa shuh bad mynta dang ap ban ioh ia ka jingmynjur jong ka sorkar.
Na ka liang jong u nongialam ka liang pyrshah u Dr Mukul Sangma, u la ong ba ki paidbah ha Garo Hills ki tip ia ka jingialeh politic ha kaba ia dei bad kane ka Medical College bad sa slem ban ioh ban tei ia ka. Halor kane ka jingkren na ka liang jongu myntri rangbah u la jubab ba ka sorkar ka sngewkhia jur ia kane wat ha dien san snem ba la buh mawnongrim ym pat sdang ia ka jingtrei. Na ka liang jong ka sorkar kan pynthikna ba shen yn ioh ban sdang noh ia kane Medical College ha Tura.
U Bah AL Hek u la jubab shai kdar hapoh ka iing dorbar ba ka sorkar kan pyntrei ia kane ka Medical College ha Tura. U la ong ba ka jingbym pat lah ban sdang ia kane ka Medical College ka long ba ha por ba pynkhreh iaka skhim ka jinglut ka long T.189 klur bad mynta kane ka jingtrei kala kiew sha ka T.243 klur. Ka jingbei pisa na ka bynta ka jingtrei ka long ha ka jingianoh syniang kaba long 905 na ka sorkar pdeng bad 10 % na ka sorkar jylla.
