Shillong, Jylliew 06: U Myntri rangbah ka jylla u Conrad K Sangma u la ong ba ka long kaba sngewdiaw hateng hateng wat la kam dei ka ktien ban pyndon kam, ban iohi ba don katto kane na ki long dien kim nang ban ai burom ia ki nongialeh laitluid, khlem da pyrkhat kumno la jia haba ki nongialeh laitluid ki shah ban pynioh ia ka jinglaitlyuid.
Haba kren ha ha kane ka jingialang ha Raj Bhavan Durbar Hall shuwa ban plie ia ki dur jong ki lai ngut ki khla ka wait, ki nongialeh laitluid jong kane ka jylla Meghalaya, U Tirot Sing, u Kiang Nangbah bad u Pa Togan N Sangma, u myntri rangbah u la ong ba dei ban pynkynmaw ia ki long dien bad wat iaka pateng ka ban sa wan bad kane ka long shibynta ban pynrung ia ka mynsiem ieit ri bad ka jingieit ia la ka jong ka Ri.
Kane ka jingbuh ia ki dur jong kine ki lai ngut ki khla kawait jong ka jylla ha Raj Bhavan ka long ka jingsdang ban pyni sha ka pyrthei ia ka jingdon ki riew ialeh laitluid kiba dei na kane ka jylla. U myntri rangbah ka jylla u la ai ka jingkhublei kaba kyrpang ia u Lat ka jylla kaba u la lah ban leh ia kane ka kam kaba khraw.
Kane shisha ka dei ka sngi sah kynmaw kaba khraw bad ka burom ka leit sha u Lat jong ka jylla u ba la shim ia kane ka sien jam kaba khraw ha kaba u la pyrkhat ban buh ia ka dur jong kine ki riew khraw ka jylla bad pynurlong ia kane bad kane ka dew shai ym tang ba u Lat ka jylla u don ka jingieit ia ka jylla hynrei ka jingdon ka jingiadei bad ki nongialeh laitluid kane ka pynishai ba u don ka jingkit khlieh na ka bynta Ri.
Kane ka long kaba dei eh ba ia ki dur jong kine ki lai ngut ki nongialeh laitluid jong ka jylla la buh ha kane ka jaka kaba kyrpang ka Durbar Hall jong ka Raj Bhavan kiba dei ki nongialeh laitluid na kane ka jylla. Kane kan iai pynkynmaw na ka por sha ka por ba kumno kine ki lai ngut kila ialeh ban pynlaitluid ia kane ka ka Ri kam dei ban long kaba sep ei.
Ha ka jingkren jong u Myntri Rangbah u la ong ba ka die ka jingshisha ba bun ki nongialeh laitluid kiba la aiti ia la ka jingim na ka bynta ka Ri, bun kila khlad ha ki iing byndi hynrei ka kyrteng jong ki kam don ha ki kot history, u la iathuh ba u la ia kren bad kum ki nongthoh history bad u wei na kita ki long u Prof David Syiemlieh Chairman barim ka MPSC.
Ha kane ka jingiakynduh u Prof David u la ai ruh ka kot kaba u la thoh bad ha kane ka kot u la kdew ia bun ki nongialeh laitluid bad kum kine ki jingtip ki long kiba kongsan ym tang ia kane ka pateng kaba mynta hynrei wat na ka bynta ka pateng ban dang wan namar shisien ba la tip la lah ban sngewthuh kaei ka jingmut ban don ia ka jinglaitluid.
U Myntri rangbah u la iathuh ba ka sorkar kala thaw ia ka Committee ban peit ia kane bad u Prof David u long u Chairman bad kane ka committee kan peit ia baroh ki khana pateng jong ki jaidbynriew, kumno ka jia shuwa ban ioh ia ka jylla, kumno ka jai ha dien ba la ioh ia ka jylla bad shuwa ban ioh ia ka jinglaitluid bad shuwa kata ruh.
Ka bynta kaba nyngkong ba kane ka committee kan hap ban pyndep ka long haba la ioh ia ka jylla bad kaei ka jylla ka lah ban leh ha kine ki 50 snem jong ka jingioh ia la ka jong ka jylla. Ha dien kane ruh la bthah ban pynkhreh kumno ban wat jingtip bniah namar ba bun na kine ki kot ki sla kim don tang shijaka hynrei ki don kylleng ka pyrthei.
Kane ka jingbuh ia kine ki dur kam dei na sep ei, kane kan long ka jingpynkynmaw na ka por sha ka por ia baroh bad dei ban don ka jingkitkhlieh u wei pa u wei bad kan shim ia ka kabu haba don ka lat ban noh syniang lang sha ki briew bad sha ka Ri baroh kawei.
Ha kane ka sngi la don lang ruh u Bah Hamletson Dohling, Lahkmen Rymbui, Bah Banteidor Lyngdoh, James K Sangma, Bah AL Hek, Bah Samlin Malngniang kiba dei ki myntri sorkar, u Chief secretary ka jylla, u Justice Hamarsan Singh Thangkhiew , u Justice Wanlura Diengdoh bad kiwei kiwei ki heh sorkar.
