Shillong, Nailur 06: Ha ka sngi sdang jong ka iing dorbar synrai jong ka iing dorbar thawaiñ ka jylla Meghalaya mynta ka sngi kala pynlong ia ka jingsngewlem halor ka jingkhlaw noh jong ki nongmih khmat paidbah ha kylleng jong ka Ri kiba la khlad hapoh kine ki hynriew bnai ba la dep.
U myntri rangbah ka jylla u Conrad K Sangma haba sdang ban kren hapoh ka iing dorbar ia kane ka jingpynaw ia ka jingsngewlem halor ka jingduh noh jong ki nongmih khmat paidbah, u la ong ba ka long ka jingduh kaba khraw ia ka Ri ka jylla namar ha kine ki hynriew bnai la duh haduh 23 ngut ki nongmih khmat paidbah.
Ha ka jingkren jong u la pynpaw kyrpang ia ka jingduh halor ka jingkhlad noh jong u Speaker ka iing dorbar thawaiñ ka jylla u Dr Donkupar Roy ha kaba u la pynpaw ba dei ka jingialam jong u Dr Donkupar ba la pynwandur ia kane ka sorkar MDA kumba ka long mynta kumne.
Haba kren halo rune u rangbah u la ong ba u Dr Donkupar Roy bam kwai ha dwar u blei u long u briew u ba bat ia la ka jutang bad dei kane leh se kaba la lah ban pynlong ia u ban long u nongmih khmat khlem dkut haduh ki sngi ba kut ki jong u. U myntri rangbah u la kren ruh ha kaba ia dei bad kiwei ki wei ki nongialam kiba la khlad hapoh kine ki hynriew bnai.
U nongialam ka liang pyrshah u Dr Mukul Sangma ha ka jingkren jong u la ong ba ha u snem 1993 ka snem kaba u dang jop nyngkong haduh u snem 1998 ka long shisha ka snem kaba eh ia ki MLA shimet bad ha kane ka por kala wanlam ia ka jingiajan jong u hapdeng jong u bad u Dr Donkupar namar ki jop kum ki kyrtong shimet.
Ha dien jong kane kala don ka jingiatrei lang ha ka sorkar bad ha ka jingiatrei kam u shem ba u Dr Donkupar Roy u dei u briew u bym juh bun nia hynrei haba u kren u kren lyngkot hynrei ki long ki ktien kiba kit jingmut shisha bad u la pynkynmaw ba dei tang u Dr Donkupar u ba la ioh ban don ha baroh lai tylli ki shuki kiba don kam ha ka jylla, kum u Myntri rangbah ka jylla, Nongialam ka liang pyrshah bad kum u Shongnor ka iing dorbar thawaiñ.
Ha kane ka sngi u Nongialam ka liang pyrshah u la pynpaw ruh ia ka jingsngewlem halor ka jingkhlad noh jong u MLA barim ka Tikrikilla bad kiwei kiwei ki nongialam, kiwei kiba la kren ha kane ka sngi ki long u bah Sanbor Shullai, AL Hek, Dr Ampareen Lyngdoh badkiwei dei ki MLA.
