Sorkar: Wat khang shuh ia ka internet ba ka ktah ia ki paidbah kyntu ka AJYWO

Shillong, Jylliew 18: Ka AJYWO Central Body ka la ong ia ka sorkar jylla ba kam dei shuh ban khang ia ka internet ba shitom palat ki paidbah ba pyndonkam hok ia ka internet khamtam eh ia ki samla pule, ki samla ba dang pyndep ia ki course ba pher ba pher bad ki samla wad kam khlem da kheiñ ia kiwei pat ki kam  ki jam ha kaba ki paidbah ki donkam bha ka ia ka internet man la ka sngi ha kane juk teknoloji-internet.

“Ka jingkwah jong ka ri India ka long ban digitalize noh ia baroh ki kam ki kam hapoh jong ka ri bad kane ka la sdang ban iaid shait shait sha khmat kat haduh ba mynta ngi la iohi ba ia kiba bun ki kam ki jam lah sdang pyniaid beit hi online lyngba ka internet. Kumta ka jingkhang noh jong ka sorkar jylla ia ka internet ha kine ki por bun bun sngi bad pynbud sa kaba mynta 48 kynta ka la ktah jur bha ia u babun balang. Don ruh ki ba hap siew shah dain duna khlem dei hok namar ba kim ioh pyndep ia ki kam jong ki hapoh ka por ba la buh tang na ka daw jong ka jingkhang ia ka internet. Kane ka la ktah jur shi kat dei eh ia u paidbah.” Ong u Bah M H Dkhar, President jong ka AJYWO Central Body.

“Pynbha bad pynkhlaiñ ia ki kor ki bor bad jingtrei kam jong phi (sorkar) lyngba ka Cyber Laws bad ki briew jong phi ki ba dei peit ia kane.  Buddien, kem bad pynshitom ia kiba pyndonkam beaiñ ia ka internet hynrei ym ban pynshitom pat ia u paidbah kumne katba ki runar-internet pat ki lait suk.” ong biang u Bah M H Dkhar.

U Bah M H Dkhar u la ong shuh shuh, “Ka AJYWO ka sngewkhia jur halor ka jingkhang ka sorkar ia ka internet ha kine ki sngi ba la dep, namar ka la pynshaiong ia u paidbah. Ka jingkhang ia ka internet, kane, ym tang ba ka ktah jur ia u paidbah ha kiba bun ki liang, hynrei ka long ruh pyrshah ia ka Hok Shongtynrai (Fundamental Rights) jong u nongshongshnong jong ka ri India ia kaba la pruid dak ha ka Riti Synshar jong ka ri, kaba ai ha u nongshongshnong jong ka ia ka  hok jong ka mon laitluid ha ka kren ka khana bad ka pynpaw ei ei ia la ka jingsngew lyngba kino kino ki lad ruh.”

“Ngi khmih lynti ba nangne sha khmat, ka sorkar, kan pyndonkam la ka jong ka bor bad ka iktiar ban tem ia ki jingsniew bad ka huri hura ha ka imlang ka sahlang khlem da pynshitom ia u paidbah kumne (da kaba khang internet) bad ruh, ka dei ban da pyrkhat sani bha ha shwa ban shim ia kano kano ka sienjam ban tem ia kiba kum kita, khnang ba kaba kum kata ka lynti kaba ka sorkar kan dei shim kan ym ktah ia u paidbah.” Kren pynkut u Bah M H Dkhar.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet