Shillong, Risaw 17: Mynta ka sngi kawei ka trok kala syllad ia ki dukan dei jingdie ha rud surok ha ka shnong Thangsalai ha Shillong By-Pass bad kane ka jingjia kaba sngewsih saw ngut ki briew kila duh ei ia ka jingim, kane kala jia antad ha ka por phra baje mynta mynstep.
Katkum ki lat khubor kila iathuh ba kine ki briew saw ngut ki dei kiba buh dukan pusari ha rud surok bad ki dei na ka shnong Thangshalai, kiba khlad ha kane ka jingjia ba sngewsih ki saw ngut ki long kmie bad wei rangbah.
Katkum ki lad khubor la iathuh ba mar ia ioh ia kane ka jingtip na ka liang jong ki pulit kila leit bran bran sha katei ka jaka ha kaba kila ioh ban bat ia kane ka trok hynrei u nongniah ia kane ka kali u la ioh ban phet bad na ka liang jong ki pulit ki dang thwet ia u nongniah ka trok.
Katkum ka jingtip kaba la ioh na ki pulit kila ong ba kane ka trok ka wan na thain Jowai bad mut leit sha Guwahati, hynrei ynda poi ha kane ka jaka kala leit ban tynrah ia ki dukan ha rud surok ha kaba saw ngut ki briew kila khlad ha shen, kat haduh ba thoh ia kane ka khubor ym pat ioh ia ka kyrteng jong kiba khlad.
