Shillong, Nohprah 16: U MLA/MDC barim ka Nongkrem Constituency, u Bah Ardent Miller Basaiawmoit u la pynpaw ba tang ka notification ka la biang pura ia ka sorkar jylla ba kan wan shakhmat ban pynbna noh ia ka rai ban pyntreikam shi syndon ia ka Inner Line Permit (ILP) ha kane ka jylla.
Haba kren bad ki lad pathai khubor mynta ka sngi, Bah Ardent u la pynkynmaw ba ha u snem 2013, mynba u dang long kum u nongmihkhmat ne MLA, u la leit ban rah ia ka Resolution hapoh ka iing dorbar thaw ain jong ka jylla, hynrei kane ka mat jingdawa ka jong u ha kito ki por ban pyntreikam ia ka ILP ha Meghalaya la theh umpjah hadien ba la shah rem noh lyngba ka voice vote.
Haba phai sha ka jingiakhih jong ki paidbah, u Bah Ardent u pynpaw ia ka mynsiem kaba sngew kmen ba un shem bad iohi ia ka jingmih paidbah ban ia snoh kti lang ban dawa tyngeh na ka sorkar jylla ba ka por ka la donkam ban pyntreikam ia ka ILP, hadien ba ka sorkar NDA ha ka taiew kaba la dep ka la lah ha ka ban ioh ia ka jingmynjur na baroh artylli ki iing dobar thaw ain ka ri ka Lok Sabha bad Rajya Sabha naka bynta ban pyntreikam ia ka Citezenship Amenmend Act, 2019.
Haba ia dei bad kane, u Bah Ardent u kyntu ia ki paidbah ba kim dei ban shongthait ha kane ka kynti kaba mynta, namar u soh jingdawa ban pyntreikam noh ia ka ILP ha kane ka jylla mynta la jan ioh pura ia ka, hadien ba ka sorkar jylla ka la shim ia ka rai ba kan lum ia ka dorbar ba kyrpang ban shim lang ia ka rai na ka bynta ban pyntreikam noh ia ka ILP.
Shuh shuh u bah Ardent u maham jur ia ki paidbah nongshnong ka jylla, ba kim dei shuh ban dang shah pynbiej ne shah pynngop ha kane ka kynti kaba myntra, ne ban ailad ia ki politician ba kin shim kabu ba kin pynslem ia kane ka jingdawa ia ka hok ka jong ki, hynrei ba kin ieng iakhun da kaba tyngeh tad haduh ban da ioh syndon ia ka ILP ha ka jylla.
