Shillong, Nailar 30: U bah Michael Kharsyntiew u wei na ki riew trei mon sngewbha mynta ka sngi u la ai jingiarap da ki marbam ia ki long iing kiba dukan ka jingioh hapoh ka shnong Wahthapbroo ha ka jingiadon lang ki seng long kmie ka kong Suk Pariat kum ka president.
Ha ka jingkren lyngkot shuwa ban sam ia ki jingiarap kiba u la ai sha ki nongshong shnong Wahthapbroo, u la ong ba ha kane ka jingiakhun pyrshah ia ka khlam COVID-19 tang ka sorkar marwei kan nym lah ban leh ei ei hynrei don kam ia ka jingiatreilang na baroh ki liang kum ki paidbah.
Ka kong Suk Parait ha ka jingkren jong ka kala pynpaw ia ka jingsngewnguh ia u bah Michael u ba la kloi ban kner ia la ki jong ki kti ban iarap ia ki briew jong kane ka shnong kiba don ka jingduna ha ka jingioh ka jong ki bad kala ong ba kan bha lada kiba ioh ba kot kin ia mih ban iarap lem kumba la leh u Kharsyntiew kan long ka jingkyrkhuh ia ki ba duk.
Kane ka jingiarap kaba u Bah Kharsyntiew u la noh syniang sha ki paidbah kam dei ka sien kaba nyngkong hynrei u la kner ia ki kti jingiarap jong u sha ki long iing kiba duk ha ka por ba jylla ka dang don ha pdeng ka jingpakhang shnong shnong ba iada na kane ka khlam COVID-19.
