Shillong, Naiwieng 08: Ka HYC Central Executive Committee lyngba ka Education Cell ka jong ka, lyngba une u kyrwoh ka pynrem jur ia baroh kito kiba donkti ha ka kam jyrsieh tah Sia lieh ia ka jingthungkam Nonghikai ha ki LP Schools ha ka Jylla ha u snem 2010. Katkum ka CBI Report lah shem ba haduh 15 ngut ki heh ki hain ba kynthup ia ki Ministers ha kito ki por, Ki MLA, MDC, Ex MLA bad kumjuh ruh ki heh sorkar ki ia don bynta lang ha kane ka kam shukor kam thok da kaba ki ai ia ki kyrteng jong ki briew jong ki ban thung kam wat lada kane ka long be ain bad pyrshah ia ka riti synshar jong ka Ri.
Ka seng ka pynrem jur ia ka Education Minister ha kato ka por kaba lah aibor bad kyntu ia ki ophisar ka Education Department ban tah sia lieh ia ki Score sheets khnang ba yn lah ban thung be ain ia ki briew jong kitei ki heh ki hain ne ki Nongmihkhmat paidbah ba kup snieh langbrot.
Ka Seng kam lah khlem da pynpaw ia ka jingsngewkhia ba ka Sorkar ka lah pynlut lehse da ki phew lak bad klur tyngka na ka bynta ban pynlong ia ki eksamin bad interview ban thungkam nonghikai ha u Snem 2010 kaba dei hi ka pisa paidbah lyngba ka jinglum khajna ka jong ka na ngi ki Nongshongshnong jong ka Jylla. Lah hap ruh ban pynlut da ki phew lak na ka bynta ban thung ia ka HLSC ja ba lah shong bad wad bniah halor kane ka jyrsieh.
La pynsyrwa ia ka pisa paidbah ha ka ban ialeh ia ki case halor kane ka bynta ha High Court bad Supreme Court. Kine baroh ki jingpynlut kidei ki pisa kiba ma ngi ngi siew sha ka Sorkar kum ki khajna bapher bapher. Ka Sorkar ne ki Minister nalade hi kim lah ban shna ne pynmib pisa lymda ki shim khajna na ngi ki paid Nongshongshnong. Ban pynlong biang ia ka Recruitment ban thungkam ka Sorkar ka hap ban pynlut pisa biang. Hato kame kam dei tang ka jingpynsyrwa ia ka pisa jong u Paidbah.
Kumta ka Seng ka dawa ba baroh kito kiba donkti ha kane ka jyrsieh tah sia lieh kiba lah paw kyrteng ha ka CBI Enquiry kiba kynthup ia ka kong Ampareen Lyngdoh, Dr RC Laloo, Bah PL Tariang, Bah Ronnie V Lyngdoh, Bah Remington Pyngrope, Bah Charles Pyngrope, Bah Sanbor Shullai, Bah Prestone Tynsong, Bah AL Hek, Bah Don Kupar Massar, Bah F War, Bah M. Pariat, Bah JA Lyngdoh, Bah Lambor Malngiang bad u JD Sangma, ba kidei ban siew bai lutksan da kaba ki sei na la ki jong ki pla ban pynlut ia ki jinglut jingsep ha ki kam bapher bapher ban jied thymmai biang ia ki Nonghikai LP Schools hapoh ka jylla. Ka Sorkar kam dei ban ktah ia ka pisa paidbah ban pynlut biang sa shisien ia kane ka kam.
Ka Seng ka dawa ruh ba ki Minister bad MLA kiba lah paw kyrteng ha ka CBI Enquiry kidei ban hiar shuki noh mardor kum ka dak ka jingsngewkhia halor kane ka jingleh jong ki.
Ha kaba iadei bad ki paidbah jong ka Jylla ka Seng ka kwah ban kyntu ia phi lang baroh ba phin da ia pyrkhat bad puson bha ban jied ia ki Nongmihkhmat ki jong phi kiba kum kino phin phah ban ia sait na ka bynta jong phi. Wat nym ia jied kylmar shuh namar kiba kum kine ki jingjia ki lah ban wan jia biang lada ngim long kiba husiar khamtam lei lei ia kito kiba lah paw kyrteng ha ka CBI Report. Ong u Bah Roy Kupar Synrem Education Secretary jong ka seng HYC.
