Shillong, Nailar 05: Mynta ka sngi ki hynriew ngut ki MLA kiba kyntup ia u Bah Banteidor Lyngdoh, Hamletson Dohling, Jeson S Mawlong bad u Gavin Myllimngap na ka PDF, u Bah Lambor Malangniang (Ind) ba u Saleng A Sangma jong ka NCP kila thaw ia ka United Progressive Front (UPF) bad kila ai ia ka shithi sha u Deputy Speaker u Timothy D Shira ban pan ia ka jingithuh hapoh ka iing dorbar kum ka kynhun.
Namar ba u Deputy Speaker um don hapoh Shillong mynta ka sngi, ia ka shithi la ai sha u Joint secretary jong ka Meghalaya Legislative Assembly ha kamra trei kam jong u Deputy Speaker. Ha kane ka por ba ai ia ka shithi baroh hynrei ngut ki MLA kila ia don lang. Ia ka shithi la ai da u Bah Banteidor Lyngdoh myntri ka rep ka riang ha u Joint secretary.
Haba kren ha ki lad pathai khubor ha dien ba la dep ban ai ia kane ka shithi, u Bah Banteidor u la ong ba ka jingthmu ba ki thaw ia kane ka kynhun ka long ban ia kren bad ka sorkar ia ki jingdon kam ka jylla kum ka kynhun ym shuh marwei marwei, haba ia dei bad ka jingeh kin ia kren bad ka sorkar kum ka kynhun.
U Bah Hamletson Dohling, myntri ba dei peit ia ki kam pynroi sor u la ong ba ka jingthaw ia kane ka kynhun ka long ban pynthikna ba kane ka sorkar MDA hapoh ka jingialang jong u Conrad K Sangma kum u myntri rangbah ka jylla ka dei ban neh haduh ba kut ka san snem.
