Shillong, Lber 21: Ki shipai BSF katba ki dang iaid pahara ha khappud bad ka Bangladesh ha Lukaichar ha South West Garo Hills District, kila iohi ia ka kali kaba kit masi ha jan jong u mawthum, na ka liang jong ki shipai BSF ynda kila tur ha jan, kine ki nongkhaii masi kila ther da ki maw pyrshah ia ki BSF.
Haba iohi kane ka jingleh jong ki nongkhaii masi, ki BSF kim banse ban pynsangeh ia kane ka kali da ka kawang da u stun grenade, ha kane ka jingleh jong ki BSF kila ioh ban ker mut ia kane ka kali kit masi bad ki la ioh ban kem ar ngut ki khar Bangladesh, u Abdul Karim bad u Hamidul Islam.
Haba la kem ia kitei ki ar ngut na ka liang jong u Abdul Karim ba du Hamidul Islam kila phla ba ki dei tang ki nongkitnong bad kila iathuh ba ki trai masi ki siew haduh T.1500 tyngka ka bai niah ia kawei ka masi bad kila phla ruh ba ia kine ki masi la leit shim na u Filbat Sangma.
La ong ba ia kine ki masi la leit ban kit na iing jong u Filbat Sangma na ka shnong Nurubguoara bad ki dei ban pynpoi ia ki masi sha u Ashab Ali u nongthied ba ka Bangladesh kine kiba la shah kem baroh ar ngut ki dei ki khar Bangladesh.
Kum kane ka jingkem masi ki BSF kila ioh ruh ban kem na Tuka ha East Khasi Hills District bad Gumaghat hapoh jong ka South West Khasi Hills District baroh ki masi kiba la ioh ban kurup ki long 24 tylli. Na ka liang jong ki BSF kila kyntu ia ki pulit bad ia ki BGB ba kin long kiba phikir ban the lakam ia kane ka kam khaii masi tuh sha Bangladesh.
