Shillong, Nailur 21: Mynta ka step por khyndai baje ei ei mynstep ka lapbah kala ther kynsan ha Ri Bhoi District kaba la wanrah ia ka jingslei um hapoh jong ka surok bah Shillong Guwahati khamtam eh ha ka jaka test Corona ha Umling.
Katkum ka jingiathuh jong ki briew kiba hap ba iaid lyngba katei ka surok mynta ka step la ong haba ki hiar ban leit sha Guwahati ynda poi ha katei ka jaka kim lah ruh ban iaid namar ka um kala shlei man ha surok.
Kane ka jingslei um kala kiew shaduh ka jaka ba test Corona wat kane kala long kham jrong na ka surok, namar ki kali kiba hiar na Shillong ki hap ban iaid beit bad dei tang kiba kiew ki hap ban iaid lyngba ka jaka test Corona kaba la shlei um mynta ka step.
Ka jingshlei um hapoh kane ka surok bah ban leit na Shillong sha Guwahati kam dei shuh kaba thymmai hynrei kala long ha bun ki bynta jong kane ka surok bah, ia kane ka jingeh u MLA jong ka Nongbah u bah Mayralborn Syiem u la wanrah ia kane ka phang ban ia kren hapoh ka iing dorbar thawain ka jylla.
